Përkundër faktit që dështuan të fitojnë në njërën prej dhjetë ndeshjeve të tyre të fundit, ka qenë një sezon i parë shumë i mirë për Las Palmas pas rikthimit në elitën e futbollit spanjoll.
Të besuarit e Garcia Pimientas ranë në pozitën e 14-të gjatë javëve të fundit, por rënia nga kategoria elite e futbollit spanjoll nuk ishte asnjëherë një çështje për ta.
Gjatë këtij sezoni përveç lojës sulmuese që e karakterizoi Las Palmasin, në pah dolën disa futbollist të talentuar, njëri prej te cilëve është edhe Alberto Moleiro.
Moleiro, i cili shpeshherë është krahasuar me Pedrin e Barcelonës, konsiderohet si njëri ndër lojtarët më të mirë të ri të futbollit spanjoll.
Ai shkëlqeu me paraqitjet e tij në Segunda Division vitin e kaluar, ndërsa atë formë e ka bartur edhe këtë edicion në La Liga. Ai ndoshta nuk ka arritur të bëjë më shumë se sa dy gola të shënuar dhe tri asistime, por aftësitë e tij taktike dhe teknike janë ato që kanë rënë në syrin e ekipeve të mëdha evropiane.
Disa klube të ndryshme përgjatë Evropës janë në dijeni të talentit që Moleiro posedon dhe siç raporton Diario AS, dy nga ekipet e mëdha që kanë shprehur interesim për spanjollin janë Liverpooli dhe Interi.
Real Betisi dhe Villarreali gjithashtu po monitorojnë gjithashtu situatën e tij, ani pse është thuajse e pamundur që këto dy klube të përballojnë shumën prej 25-30 milionë eurosh që duhet të paguhet për kartonin e tij.
Barcelona gjithashtu ka mbajtur një interesim tek Moleiro gjatë viteve të fundit, por nuk ia dolën që të sigurojnë nënshkrimin e tij në 2022. Sidoqoftë, me shumë gjasa ata nuk do të tentojnë që të hyjnë përsëri në negociata me Las Palmasin, dhe kjo mund t’ia hap rrugën Liverpoolit./Telegrafi/