Ministria e Jashtme e Rusisë ka dëbuar 40 diplomatë gjermanë vetëm disa javë pasi Berlini njoftoi vendimin e tij për të dëbuar të njëjtin numër të stafit diplomatik rus.
Në një deklaratë, ministria tha se kishte marrë vendimin për të shpallur stafin si “personae non gratae” pasi Gjermania shpalli “të padëshirueshëm” një “numër të konsiderueshëm” zyrtarësh në ambasadën ruse në Berlin.
Në fillim të këtij muaji, Ministria e Jashtme e Gjermanisë njoftoi vendimin e saj për të dëbuar 40 diplomatë rusë pasi Moska po përballet me reagime globale dhe akuza për krime lufte.
Ministrja e Jashtme e vendit Annalena Baerbock tha se imazhet e marra nga qyteti ukrainas Bucha, i cili ndodhet në veriperëndim të kryeqytetit, treguan “një synim për të shkatërruar, që shkon përtej të gjithë kufijve”, përpara se të shtonte se po përgatiteshin masat e mëtejshme me partnerët.
Disa vende të tjera të BE-së, përfshirë Lituaninë, Letoninë, Estoninë, Bullgarinë, Poloninë, Sllovakinë dhe Republikën Çeke, gjithashtu kërkuan që diplomatët rusë të largoheshin nga vendet e tyre.
