Nata e 22 janarit në elitën e basketbollit amerikan NBA nuk do të harrohet lehtë, së paku nga Joel Embiid dhe Karl Anthyony Towns.
Ka qenë një natë e rekordeve për dy qendrat e lartpërmendura që kanë arritur të thyejnë rekorde personale sa i përket pikëve të shënuara në një ndeshje.
Philadelphia 76ers ka marrë një fitore të madhe ndaj San Antonio Spurs me 10 pikë diferencë 133:123 në një ndeshje ku Embiid ishte fantastik.
Qendra kamerunase ishte i jashtëzakonshëm në këtë duel duke realizuar 70 pikë që ishte rekord personal për të, shtoi 18 kërcime dhe dhuroi pesë asistime.
Paraqitje brilante kishte edhe qendra e Minnesota Timberwolves, Karl-Anthony Towns ne sfidën ndaj Charlotte Hornets të cilën skuadra e tij e humbi me tre pikë diferencë 125:128.
Town e mbylli ndeshjen me 62 pikë që ishte rekord personal për të, shtoi edhe tetë kërcime e dy asistime, por që në fund nuk mjaftuan për fitore.