Modelja e njohur kroate Nives Zheljkoviç, e njohur si Nives Celsius ka publikuar fotografi gjatë pranimit të saj në Vilën Vodno të Presidencës në Shkup. Në rrjetet sociale ajo ka publikuar edhe një fotografi bashkë me presidentin Stevo Pendarovski. Nga zyra e Presidentit thonë se ajo ishte e ftuar me rastin e mbajtjes së Turneut të 30-të të mediave në fustal, të organizuar nga Radio Sportive 90.3 FM.
Nga kabineti theksojnë se në zyrën e Presidentit u mbajt një pritje e shkurtër për pjesëmarrësit dhe organizatorët e turneut. Nives Zheljkoviç ishte në listën e të ftuarve të Radio Sportive, në mesin e të cilëve ishin rreth 70 gazetarë, sportistë dhe artistë të estradës nga vendi dhe rajoni.
Zheljkoviç në rrjetet sociale gjithashtu ka publikuar një video ku shihet se si i “ngacmon” gardën në hyrje të Vilës Vodno.
