Ministria e Shëndetësisë ka bërë të ditur që në rast se ish-kryediplomati kosovar dhe i pari i partisë Aleanca Kosova e Re, Behgjet Pacolli, kthehet në Kosovë nga Zvicra, do të futet në karantinë.
Sipas njoftimit të lëshuar, Ministria e Shëndetësisë thotë se pavarësisht pozicioneve që kanë qytetarët e Kosovës, përpara çështjeve të shëndetit publik do të trajtohen sipas kritereve të paracaktuara shëndetësore, përcjellë Klan Kosova.
”Nga mediat u njoftuam me ankesat e Kryetarit të AKR dhe njëherësh deputetit të Republikës së Kosovës, z. Behgjet Pacolli. Deri më sot në Ministrinë e Shëndetësisë nuk ka mbërritur asnjë kërkesë zyrtare për asnjë nga ato çka përmenden në reagimin e z. Pacolli.
Siç kemi konfirmuar ditën e djeshme për rastet e kthimit të shtetasve të Republikës së Kosovës aplikohen masat e njëjta. Pavarësisht pozicioneve që kanë qytetarët tanë përpara çështjeve të shëndetit publik trajtohen jo nga pozita por sipas kritereve të paracaktuara shëndetësore”.
”Po ashtu, nuk jemi të njoftuar me asnjë praktikë nga vendet e përparuara ku dikush për shkak të pozitës nuk i nënshtrohet kritereve të parandalimit të përhapjes së pandemisë”.
”Reagime të këtij lloji përçojmë mesazhe të gabuara tek qytetarët tanë të cilët po zbatojnë me korrektësi rekomandimet e institucioneve”.
