Më 29 shtator, në Ditën Ndërkombëtare të Ndërgjegjësimit për Humbjet dhe Mbetjet Ushqimore, organizatat shëndetësore dhe humanitare paralajmërojnë për një paradoks global: rreth 1 miliard ton ushqim përfundon çdo vit në mbeturina, ndërsa qindra miliona njerëz përballen me mungesë ushqimi.
Sipas të dhënave të Programi i Kombeve të Bashkuara për Mjedisin (UNEP) dhe Organizata e Kombeve të Bashkuara për Ushqimin dhe Bujqësinë (FAO), rreth 60% e mbetjeve ushqimore krijohen në familje, 28% në sektorin e hotelerisë dhe shërbimeve, ndërsa 12% në shitjen me pakicë.
Afërsisht 19% e ushqimit të disponueshëm për konsumatorët, ose rreth 1.05 miliard ton, hidhet ose prishet. Humbje të tjera ndodhin edhe para se ushqimi të arrijë në treg, gjatë korrjes dhe transportit.
Vlera e ushqimit të hedhur çdo vit tejkalon 1 trilion dollarë. Sasia e ushqimit që shpërdorohet në botë do të mund të ushqente rreth 1.26 miliardë njerëz në vit.
Ekspertët theksojnë se reduktimi i mbetjeve ushqimore ndihmon në sigurinë ushqimore, mbrojtjen e burimeve natyrore, uljen e emetimeve dhe kursimin e parave.
Familjet mund të kontribuojnë duke planifikuar blerjet, kontrolluar afatet e përdorimit, ruajtur siç duhet ushqimet, gatuar sasi të përshtatshme dhe përdorur ose ngrirë tepricat.
