Letra e presidentit amerikan, Joe Biden, dërguar presidentit serb Aleksandër Vuçiç, me të cilën i kërkohet njohja reciproke Serbi-Kosovë, u prit mjaftë mirë në vendin tonë.
Letrën e Biden me kërkesë njohjen reciproke Kosovë-Serbi, njohësit e zhvillimeve politike në vend e quajnë si një urim i cili nxjerrë në sipërfaqe kërkesën eksplicite të Shtëpisë së Bardhë dhe të administratës së re amerikane për njohjen reciproke Kosovë-Serbi, si kusht qenësor për normalizimin e marrëdhënieve në mes dy vendeve.
Analisti Fatmir Bajraj shprehet se kjo letër e cila presupozon saktë njohjen e Kosovës nga Serbia, ka “trazuar” pushtetin në Serbi dhe presidentin Vuçiq.
“Vala koherente e qëndrimit të administratës amerikane dhe Presidentit Biden në lidhje me marrëveshjen e Uashingtonit të 04 shtatorit në Shtëpinë e Bardhë, ka dëshpëruar Vuqiqin dhe Kurtin, bilës këtë të fundit e ka zhveshur nga hipokrizia dhe demagogjia. Urimi me thumb për ditën e shtetësisë së Serbisë nga ana e Presidentit amerikan, Joe Biden, urim i cili nxjerrë në sipërfaqe kërkesën eksplicite të Shtëpisë së Bardhë dhe të administratës së re amerikane; njohjen reciproke Kosovë-Serbi, si kusht qenësor për normalizimin e marrëdhënieve në mes të dyja vendeve. Shtyrja para e “sintagmës” për një marrëveshje e cila presupozon njohjen e Kosovës nga Serbia, sikur ka “trazuar” pushtetin në Serbi dhe presidentin Vuçiq, i cili përpiqet të “amortizoj” trysninë faktike të Administratës amerikane në lidhje me avancimin dhe njohjen e Kosovës si akt të kryer për Shtëpinë e Bardhë dhe Presidentin, Biden”, u shpreh Bajraj.
Ai është i mendimit se letra e Presidentit Biden, pason letrën e një viti më parë nga ish-presidenti amerikan, Donald Trump, me të njëjtën kërkesë dhe të njëjtin sens
“Edhe kjo me të njëjtën kërkesë dhe të njëjtin sens, dhe pikërisht në ditën e shtetësisë së Serbisë, kërkesë e cila ua ngrinë gazin në buzë për festën shtetërore dhe shtetin i cili realisht dhe faktikisht nuk është ai i Kushtetutës së Serbisë, në preambulën e së cilës, shteti Kosovës, është pjesë integrale e saj, si “Kosovë e Metohi”. Pushteti në Serbi dhe vetë presidenti serb, Aleksandar Vuçiq, tanimë është i vetëdijshëm se shtyrja në infinit e refuzimit të realitetit të krijuar në Republikën e Kosovës, pas 12 qershorit 1999, 17 shkurtit 2008 dhe opinionit këshillëdhënës të Gjykatës Ndërkombëtare të Drejtësisë me seli në Hagë, të datës 22 korrik 2010, është e pamundur, dhe shpresa e kërkim-shpëtimit në jo -koordinimin e SHBA-ve dhe BE-së karshi kësaj çështje, sa vjen e venitet. Presidenti serb, Aleksandar Vuçiq, mund të mbaj zotimin se nuk do ta njeh kurrë Republikën e Kosovës, por kjo mund të lexohet edhe në të drejtën e tij që të mos e bëjë këtë, por kjo nuk do të thotë se ai të mos detyrohet ta lëshoj pozitën e presidentit dhe të njëjtin akt, ta bëjë presidenti tjetër i Serbisë”, tha Bajraj, për “Bota sot”.
Madje, analisti Bajraj konsideron se kjo letër “gozhdoi” edhe Kurtin.
“Letra e Presidentit Biden, e cila pason me njohjen diplomatike të Kosovës nga ana e Izraelit, dhe në të cilën përsërit kërkesën eksplicite drejtuar Serbisë për njohje të shtetësisë së Kosovës, për Kurtin ishte një zhvillim aspak i dëshiruar së paku në kohë, ngase Kurti, jo vetëm që nuk kishte pranuar të shkoj në Shtëpinë Bardhë për një Marrëveshje e cila rezulton të jetë historike, por të njëjtën e kishte quajtur marrëveshje të thikave mbi hartë dhe në Shtëpinë e “Verdhë e Kuqe”, për çfarë demantin mori me 04 shtator 2020, dhe tani së fundmi me vendosjen e marrëdhënieve diplomatike me Izraelin dhe konsistencën e SHBA-ve, në marrëdhëniet ndërkombëtare dhe kryesisht në raport me Kosovën”, ka shtuar ai.
Krejt në fund, ai thekson se kandidati i LDK-së për kryeministër Avdullah Hoti, është më mëritori për shpëtimin e vendit dhe nxjerrjen e Kosovës nga geto-ja, në të cilën e kishin futur pararendësit; Haradinaj dhe Kurti.
“Deklaratat e papërgjegjshme të LVV-së dhe të ish ministrit të Jashtëm, Glauk Konjufca në lidhje me selinë e ambasadës së Kosovës në Jerusalem, janë të papërgjegjshme, tmerrësisht skandaloze dhe mbi të gjitha, të rrezikshme, për çfarë Institucionet e Republikës së Kosovës duhet të bëjnë kujdes dhe t’i japin përgjigjën e merituar kësaj fryme dhe qasje joserioze dhe të rrezikshme të LVV-së dhe lidershipit të saj. Kryeministri Hoti, meritor për shpëtimin e vendit dhe nxjerrjen e Kosovës nga geto-ja, në të cilën e kishin futur pararendësit; Haradinaj dhe Kurti. Hoti, mori drejtimin e Qeverisë së Kosovës në një kohë izolimi, pa perspektivë dhe me sanksione ekonomike dhe financiare, pa lënë anash kërcimin serioz amerikan për tërheqje të Forcave Ushtarake Amerikane nga Bondsteel-Kosovë. Kryeministri Hoti, zhbllokoi vendin nga izolimi ndërkombëtar, përfshirë edhe me Shqipërinë amë, liroi fondet e bllokuara financiare dhe ngriti në këmbë besimin dhe mbështetjen e partnerëve strategjik perëndimor në BE, dhe SHBA”, ka thënë krejt në fund analisti Bajraj.
