Kryeministri Dimitar Kovaçevski ka dënuar sulmin rus ndaj Ukrainës, përcjell TV21.
“Dënoj aktin e agresionit të hapur ushtarak të Rusisë ndaj Ukrainës. Lufta është mënyra më e keqe për të zgjidhur mosmarrëveshjet, ndërsa agresioni kundër Ukrainës është një kërcënim për paqen evropiane dhe botërore”, ka shkruar Kovaçevski.
Tutje kryeministri thekson se Maqedonia e Veriut nuk ka rrezik të drejtpërdrejtë nga lufta mes Rusisë dhe Ukrainës.
“Qeveria po monitoron nga afër situatën në Ukrainë. Gjendja e sigurisë në vendin tonë është stabile dhe për momentin nuk ka asnjë kërcënim të drejtpërdrejtë për sigurinë e Maqedonisë së Veriut”, thekson Kovaçevski.
Kreu i ekzekutivit thotë se autoritetet po përcjellin edhe gjendjen ekonomike të përkeqësuar pas sulmeve ruse në Ukrainë.
“Krahas gjendjes së sigurisë, qeveria po monitoron nga afër edhe ndryshimet në trendet ekonomike botërore të destabilizuara nga situata e re. Qeveria, si edhe më parë, do të veprojë me përgjegjësi maksimale dhe në interesin më të mirë të mbrojtjes së ekonomisë së brendshme dhe gjendjes financiare të qytetarëve”, theksoi Kovaçevski.
