Në Kosovë është rritur përqindja e rasteve pozitive me koronavirus, thuhet në të dhënat e publikuara nga Ministria e Shëndetësisë.
Nga 200 testime për sëmundjen COVID-19, 25 prej tyre kanë rezultuar pozitivë apo 12.5 për qind. Kjo përqindje është më e lartë krahasuar me ditët paraprake, shembull më 13 qershor pozitiviteti i rasteve ka qenë 1.8 për qind.
Kosova së fundmi po regjistron shifra të ulëta të rasteve me koronavirus, por po ashtu në raportet ditore të MSH-së vërehet edhe numër më i vogël i testeve të kryera si dhe të vaksinimit kundër koronavirusit.
Më 16 qershor, Instituti Kombëtar i Shëndetësisë Publike tha se pavarësisht numrit të vogël të rasteve me COVID-19, qytetarët rekomandohet të mbajnë maska në ambiente të mbyllura.
“MSH dhe IKSHPK rekomandojnë qytetarët që përkundër situatës së qetë dhe stabile epidemiologjike në vend, të jenë të kujdesshëm në zbatimin e masave preventive kundër sëmundjeve ngjitëse dhe të vaksininohen kundër COVID-19”, u tha në njoftim.
Aktualisht, në vend janë 94 raste aktive.
