Një investigim i gazetës izraelite Haaretz pretendon se kompani kryesore të industrisë së mbrojtjes së Izraelit kanë furnizuar në mënyrë të fshehtë Katarin dhe Arabinë Saudite me sisteme të avancuara ushtarake me vlerë qindra miliona dollarë.
Sipas dokumenteve dhe fotografive të analizuara nga media izraelite, kompanitë Elbit Systems dhe Israel Aerospace Industries (IAI) kanë marrë pjesë në projekte që përfshijnë sisteme mbrojtëse kundër raketave për avionët VIP të familjes mbretërore të Katarit, si edhe komponentë të avancuar për flotat e avionëve luftarakë F-15 të Katarit dhe Arabisë Saudite.
Një nga zbulimet kryesore lidhet me instalimin e sistemit C-MUSIC të kompanisë Elbit në tre avionë të familjes mbretërore të Katarit. Sistemi identifikon raketat me kërkim infra të kuq dhe përdor një rreze lazer për t’i devijuar ato, duke mbrojtur avionin nga sulmet me raketa tokë-ajër.
Sipas Haaretz, një prej këtyre avionëve është përdorur edhe nga Emiri i Katarit gjatë një vizite në Teheran vitin e kaluar.
Investigimi zbulon gjithashtu se kompani izraelite kanë qenë nënkontraktore në programin amerikan të avionëve F-15QA të Katarit, duke furnizuar komponentë strukturorë, pajisje avioni, syze të shikimit natën dhe helmetat e avancuara JHMCS, të cilat projektojnë informacionin e fluturimit në vizorin e pilotit.
Sipas dokumenteve të cituara, Katari ka blerë rreth 160 helmeta JHMCS, me një vlerë të vlerësuar prej rreth 35 milionë dollarësh.
Materiali pretendon se edhe Arabia Saudite ka përfituar pajisje të ngjashme nëpërmjet programit amerikan të avionëve F-15SA. Në këtë rast përmenden qindra helmeta luftarake dhe pajisje të shikimit natën të prodhuara nga ndërmarrje ku përfshihen kompani izraelite.
Investigimi vë në dukje se këto bashkëpunime janë zhvilluar pavarësisht faktit se Izraeli nuk ka marrëdhënie diplomatike zyrtare me Katarin dhe Arabinë Saudite.
