Komisioni kuvendor për Çështjet e Zgjedhjeve dhe Emërimeve dje njëzëri miratoi vendimin e Gjykatës Kushtetuese për ndryshimin e disa neneve të Ligjit për përcaktimin e koeficientëve për caktimin e pagave të presidentit, deputetëve dhe funksionarëve që zgjidhen dhe emërohen nga Kuvendi. Bëhet fjalë për një procedurë që Gjykata Kushtetuese ia ngarkoi Kuvendit në qershor, pasi shfuqizoi ndryshimet e Ligjit të bëra në shkurt të këtij viti, në pjesën e koeficientëve sipas të cilëve llogariten pagat e presidentit dhe gjyqtarëve të Gjykatës Kushtetuese.
Sipas vendimit të Gjykatës Kushtetuese të 17 qershorit, presidenti dhe anëtarët e gjykatës nga 1 tetori duhet të marrin paga më të larta, përkatësisht ato të llogariten sipas koeficientëve që për ta ishin në fuqi me zgjidhjen ligjore të vitit 2024. Kështu, për llogaritjen e pagës së kryetarit të Gjykatës Kushtetuese do të përdoret koeficienti 3,08, ndërsa për anëtarët e gjykatës koeficienti 2,85. Sa u përket funksionarëve të tjerë që zgjidhen dhe emërohen nga Kuvendi, për ta mbeten në fuqi ndryshimet e shkurtit të këtij viti, përkatësisht pagat e tyre mbeten të njëjta.
Siç sqaroi kryetari i komisionit kompetent kuvendor, Gjorgjija Sajkoski, ata si trup duhet të veprojnë në përputhje me vendimin e Gjykatës Kushtetuese.
“Komisioni për Zgjedhje dhe Emërime, si komision kompetent, duhet të veprojë në përputhje me vendimin e Gjykatës Kushtetuese të Republikës së Maqedonisë së Veriut, i cili u miratua faktikisht me pezullimin e një pjese të Ligjit për pagat dhe kompensimet e funksionarëve të zgjedhur dhe të emëruar. Me propozim-vendimin parashikohen ndryshime në nenin 1 të vendimit për përcaktimin e koeficientëve për caktimin e pagës. Në pikën 5: ‘kryetar i Gjykatës Kushtetuese të Republikës së Maqedonisë së Veriut’, koeficienti 2,81 zëvendësohet me koeficientin 3,08. Në pikën 16: ‘gjyqtar i Gjykatës Kushtetuese të Republikës së Maqedonisë së Veriut’, koeficienti 2,60 zëvendësohet me koeficientin 2,85”, tha Sajkoski në seancën e sotme të Komisionit për Zgjedhje dhe Emërime.
Pasi Komisioni kompetent për Çështjet e Zgjedhjeve dhe Emërimeve i miratoi ndryshimet, ato tani duhet të kalojnë edhe në seancë plenare të Kuvendit.
Për sqarim, Kuvendi në fund të shkurtit të këtij viti miratoi ndryshime të Ligjit me të cilat uli pagat, përkatësisht koeficientët për llogaritjen e pagave të personave të zgjedhur dhe të emëruar, duke sjellë kështu edhe uljen e pagave të funksionarëve.
Në nenin 14, i cili përfshin edhe kryetarin e Gjykatës Kushtetuese, koeficienti u ul nga 3,08 në 2,81. Në nenin 15, i cili u referohet gjyqtarëve të Gjykatës Kushtetuese, kjo vlerë, përkatësisht koeficienti, u ul nga 2,85 në 2,60. Ndryshe, për llogaritjen e pagave të personave të zgjedhur dhe të emëruar në Republikën e Maqedonisë së Veriut merret paga mesatare, e cila shumëzohet me koeficientin.
Por, tashmë në qershor, shumica e gjyqtarëve kushtetues mori vendim për shfuqizimin e këtyre neneve dhe që ato të pushojnë së vlefshmi nga 1 tetori, ndërsa llogaritja e pagave të tyre të bëhet sipas koeficientëve nga ndryshimet e Ligjit të miratuara në vitin 2024, përkatësisht 3,08 për kryetarin dhe 2,85 për gjyqtarët e Gjykatës Kushtetuese.
Vendimin, siç e arsyetuan atëherë nga Gjykata Kushtetuese, gjyqtarët e morën pasi me iniciativën e tyre dhe me vendim të 4 korrikut nisën procedurë për vlerësimin e kushtetutshmërisë së pjesëve të dispozitave të Ligjit.
Më konkretisht, lidhur me dispozitat e shfuqizuara, në arsyetimin e vendimit u theksua se, edhe pse ligjvënësi, Kuvendi, ka të drejtë t’i përcaktojë pagat në sektorin publik, përfshirë edhe pagat e funksionarëve, megjithatë nuk mund dhe nuk duhet ta injorojë pozitën kushtetuese të Gjykatës Kushtetuese.
“Duke pasur parasysh faktin se nga përmbajtja e neneve 14 dhe 15 të Ligjit për pagat dhe kompensimet e tjera të personave të zgjedhur dhe të emëruar në Republikën e Maqedonisë, rezulton se koeficienti për përcaktimin e pagës së kryetarit të Gjykatës Kushtetuese është i njëjtë me koeficientin e nënkryetarit të Kuvendit, ndërsa koeficienti për përcaktimin e pagës së gjyqtarit të Gjykatës Kushtetuese është i njëjtë me atë të anëtarit të Qeverisë, kryetarit të trupit punues të Kuvendit, guvernatorit të Bankës Popullore, Avokatit të Shtetit, Avokatit të Popullit, sekretarit të Kuvendit dhe sekretarit të Qeverisë etj., padyshim rezulton se me dispozitat e përmendura pagat e kryetarit dhe gjyqtarëve të Gjykatës Kushtetuese rregullohen në të njëjtin regjim normativ dhe me të njëjtën logjikë ligjore si pagat e bartësve të tjerë të funksioneve publike nga pushteti legjislativ, ekzekutiv dhe monetar etj.”, thuhet në arsyetimin e Gjykatës Kushtetuese.
Sipas Gjykatës Kushtetuese, rregullimi i pagave të kryetarit dhe gjyqtarëve të Gjykatës Kushtetuese nën të njëjtin regjim normativ me bartësit e tjerë të funksioneve publike përbën shkelje thelbësore të sundimit të së drejtës si vlerë themelore e rendit kushtetues.
