Fjalimi shqip në Parlamentin serb, Vulin: Kamberin dua ta krahasoj me Esat Pashën, jo me Shaban Polluzhen

Ministri serb i Mbrojtjes, Aleksandër Vulin, ka reaguar ndaj fjalimit të deputetit shqiptar në parlamentin e Serbisë, Shaip Kamberit.

Ai përsëri në fjalimin e tij iu është referuar shqiptarëve me emrin “shiptari”, duke shtuar se është krenar që edhe shqiptarët mund ta flasin gjuhën e tyre.

Vulin ka thënë se nuk do t’i përgjigjet për fyerjet personale, porse ka thënë se nuk mund ta krahasojë atë me njërin prej komandantëve nazist të Hitlerit, Herman Wihelm Goring, pasi as ai vet nuk e ka krahasuar Kamberin me Shaban Polluzhen, të cilin e ka quajtur vrasës.

Por, ka thënë se donë ta krahasojë me Esat Pashë Toptanin.

“As unë nuk e krahasoj Kamberin me Shaban Polluzhën, udhëheqësin e Ballit Kombëtar, ballistin, bashkëpunëtorin e gjermanëve, vrasësin, nuk do ta krahasoj me atë. Pra nuk e krahasoj me fashistin shqiptar, unë dua ta krahasoj me Esat Pashë Toptanin, ‘shiptari’ i cili ka dashur të bëjë federatë me Serbinë, shqiptari i cili dëshironte që këta dy popuj, shqiptarët dhe serbët të ishin aleatët më të afërt në Ballkan”, ka thënë ai.

Ai tutje ka thënë se nuk mund të gjesh një serb që nuk e përdorë termin “shqiptari”, duke shtuar se nuk mund t’ua ndalojnë serbëve të flasin në gjuhën e tyre.

“’Shkija’ nuk është term që përdoret, sepse ‘shkija’ përafërsisht do të thotë ‘derr’”, ka thënë ai.

Shaip Kamberi ka mbajtur javën e kaluar një fjalim në gjuhen shqipe, ku ka kritikuar se në parlamentin serb ende po përdoret termi fyes “shiptari”.