Nga sot, 26 gusht, fillon aplikimi për ushqimin e subvencionuar studentor për vitin akademik 2026/2027. Afati përfundon më 31 gusht, ndërsa aplikim të ri duhet të bëjnë edhe përfituesit e deritanishëm, edhe studentët e vitit të parë që duan ta përdorin këtë të drejtë nga 1 tetori, raporton Racin, transmeton Portalb.mk.
Studentët që do t’i plotësojnë kushtet do të marrin nga 140 denarë në ditë për ushqim, nga e hëna deri të shtunën. Aplikimi bëhet tërësisht në mënyrë elektronike, por kandidatët duhet të plotësojnë, nënshkruajnë dhe ngarkojnë dy dokumente.
Kush ka të drejtë për ushqim studentor?
Të drejtë për ushqim të subvencionuar studentor kanë shtetasit e Maqedonisë që janë studentë të rregullt të ciklit të parë ose të dytë, si dhe studentët e studimeve të integruara në universitetet shtetërore dhe private.
Kusht shtesë është që kandidati të mos ketë të ardhura mujore nga cilido burim më të larta se paga minimale neto në shtet. Nga marsi i vitit 2026, paga minimale neto është 26.046 denarë, që praktikisht është edhe pragu i të ardhurave për këtë të drejtë.
Edhe përfituesit e vjetër duhet të aplikojnë përsëri
E drejta nuk vazhdon automatikisht nga viti i kaluar akademik. Ministria e Arsimit dhe Shkencës i fton të aplikojnë të gjithë studentët që duan ta përdorin masën në vitin akademik 2026/2027 – si përfituesit e deritanishëm, ashtu edhe studentët e viteve më të larta dhe studentët e rinj të vitit të parë.
Afati kryesor zgjat nga 26 deri më 31 gusht. Duke filluar nga tetori, sistemi do të hapet përsëri nga data 1 deri më 5 të çdo muaji. Ky afat shtesë do të vlejë për studentët që nuk e kanë realizuar të drejtën në gusht ose që më vonë i kanë plotësuar përsëri kushtet.
Si bëhet aplikimi?
Aplikimi bëhet përmes portalit e-uslugi.mon.gov.mk. Kandidati duhet të plotësojë formularët „Aplikim për fitimin e të drejtës për ushqim të subvencionuar studentor“ dhe „Deklaratë për saktësinë e të dhënave të futura“.
Të dy formularët duhet të nënshkruhen dhe të ngarkohen së bashku me aplikimin elektronik. Pas dorëzimit, statusi mund të ndiqet në rubrikën „Aplikimet e mia“ në portal.
Studentët nuk duhet të sigurojnë vetë vërtetime nga institucione të ndryshme. MASH-i i siguron të dhënat e nevojshme sipas detyrës zyrtare nga Ministria e Punëve të Brendshme, Drejtoria e të Ardhurave Publike dhe shërbimet studentore të fakulteteve.
Çfarë duhet të bëjnë studentët e vitit të parë?
Afati vlen edhe për studentët e ardhshëm të vitit të parë, edhe pse një pjesë e tyre ende nuk e kanë përfunduar plotësisht procedurën e regjistrimit. Ata duhet të përpiqen ta dorëzojnë aplikimin brenda afatit kryesor, ndërsa të dhënat për statusin e studentit të rregullt MASH-i i kontrollon përmes shërbimeve studentore.
Nëse portali nuk e pranon aplikimin sepse regjistrimi ende nuk është evidentuar administrativisht, studenti nuk duhet të vendosë të dhëna të pasakta. Duhet t’i drejtohet menjëherë shërbimit studentor dhe MASH-it në adresën elektronike [email protected]. Mundësia e radhës për aplikim do të jetë nga 1 deri më 5 tetor, por në këtë rast pagesa do të fillonte në muajin pasues.
A humbin paratë e papërdorura në fund të ditës?
Jo. Nëse studenti nuk i shpenzon 140 denarët e përditshëm, mjetet mbeten të disponueshme në llogari deri në fund të së njëjtës javë, përkatësisht deri të shtunën.
Kjo do të thotë se gjatë një jave të plotë mund të jenë të disponueshme maksimumi 840 denarë. Megjithatë, shuma e pashpenzuar nuk bartet në javën e ardhshme.
Mjetet mund të përdoren nga e hëna deri të shtunën te personat juridikë të regjistruar që prodhojnë, përgatisin ose shesin ushqim. E drejta nuk vlen të dielave, gjatë festave shtetërore dhe ditëve të tjera jopune, si dhe në periudhën nga 1 korriku deri më 1 tetor.
Kur fillon përdorimi i parave?
Studentët që do ta realizojnë të drejtën përmes thirrjes së gushtit do të mund ta përdorin mbështetjen nga 1 tetori 2026. Për ata që do të aplikojnë në një nga afatet mujore të mëvonshme, mjetet fillojnë të paguhen në muajin pas aplikimit.
Pagesa realizohet përmes një llogarie të veçantë dhe një karte pagese të dedikuar nga Banka Shparkase. MASH-i dhe banka do ta publikojnë më tej afatin dhe mënyrën për nënshkrimin e marrëveshjes dhe marrjen e kartave.
Shuma mbeti e njëjtë, ndërsa çmimet vazhduan të rriten
Shuma ditore prej 140 denarësh nuk ka ndryshuar që nga viti 2023. Ndërkohë, Enti Shtetëror i Statistikës regjistroi se shpenzimet e jetesës në korrik 2026 ishin 2,3 përqind më të larta krahasuar me një vit më parë. Vetëm në raport me qershorin, çmimet në grupin e restoranteve dhe shërbimeve të akomodimit u rritën me 0,7 përqind.
Kështu, thirrja e re e ruan të njëjtën shumë nominale, por vlera e saj reale po bëhet gjithnjë e më e vogël në kushtet e rritjes së vazhdueshme të çmimeve.
