Chelsea është mposhtur në shtëpi nga Brentfordi me rezultat 2-0 në ndeshjen e vlefshme për javën e 10-të në Ligën Premier.
Blutë e Londrës janë kthyer te humbjet pas dy fitoreve dhe një barazimi, pasi u mposhten nga Brentfordi në Stamford Bridge.
Pjesa e parë e ndeshjes e karakterizua me dominim të vendasve, të cilët krijuan shumë raste, por pa arritur të gjejnë rrjetën dhe ekipet shkuan në pushim me rezultat 0-0.
Në pjesën e dytë, Chelsea e pati posedimin, por rastet i takuan mysafirëve, të cilët shënuan dy herë dhe morën fitoren.
Goli i parë në ndeshje erdhi në minutën e 58-të me anë të Ethan Pinnock, i cili shënoi për 0-1, ndërsa Bryan Mbeumo në minutat shtesë vulosi fitoren 0-2.
Pas kësaj fitore, Brentfordi kalon në pozitën e dhjetë me 13 pikë, ndërsa Chelsea një pozitë më poshtë me 12 pikë.
Në ndeshjen e radhës, Chelsea udhëton te Tottenhami, ndërsa Brentfordi e pret në shtëpi West Hamin.
