Ende nuk është e qartë nëse Karim Benzema do të luajë në ndeshjen e parë të Francës në Kupën e Botës “Katar 2022”.
Kampionët në fuqi rrugëtimin për mbrojtjen e titullit e nisin më 22 nëntor, me ndeshjen kundër Australisë.
“L’Equipe” ka raportuar këtë të shtunë se problemet e vazhdueshme të Benzemas nënkuptojnë se ai është ende në dyshim për ndeshjen e parë.
Pasi ka luajtur vetëm 26 minuta për Real Madridin në muajin e fundit, fituesi i “Topit të Artë” po vuan nga dhimbjet në gju.
Me stafin mjekësor të Francës të pasigurt për natyrën e saktë të lëndimit, është përpunuar një program stërvitor i personalizuar – Raphael Varane është lojtari tjetër që po i nënshtrohet seancave individuale.
Benzema tani thuhet se po ndihet më mirë, por statusi i tij shëndetësor mbetet një enigmë, me vetë sulmuesin që ka dhënë pak detaje për shtypin kur u pyet për lëndimin.
Mbetet për t’u parë nëse 34-vjeçari do të jetë i gatshëm për ndeshjen ndaj Australisë.
