Bashkimi Demokratik për Integrim (BDI) shpreh shqetësim të thellë për qëndrimin refuzues të partisë opozitare Besa dhe ish partnerit në qeverisje ASH si dhe opozitës maqedonase VMRO- DPMNE, ndaj Ligjit për Prokurori të Përgjithshme.
Ajo me këtë rast fton këto tre partitë që të rikonsiderojnë qëndrimin e tyre kundër këtij ligji dhe të votojnë për.
“Ky ligj, bashkë me Ligjin për Këshillin e Prokurorëve publik do të vulos datën për fillim të negociatave me Bashkimin Evropian dhe asnjë parti nuk guxon të rrezikojë të ardhmen e sigurt të vendit dhe të qytetarëve. Të dy ligjet garantojnë edhe përdorimin zyrtar të gjuhës shqipe, zgjedhjen e prokurorëve me shumicë të dyfishtë si dhe përfaqësimin e drejtë dhe adekuat të shqiptarëve në prokurori”, thonë në qëndrimin për media nga BDI.
Përgjegjësia e partive politike, siç theksojnë, “është shumë e madhe dhe përkrahja e këtyre ligjeve nga të cilat varet e ardhmja jonë evropiane nuk guxon të jetë rast i oportunizmit të imtë partiak dhe antievropian”.
“Prioritet i BDI-së është drejtësia joselektive, vetingu, sundimi i mirëfilltë i ligjit, kthimi i besimit tek gjyqësori dhe prokuroria, luftë kundër korrupsionit dhe krimit të organizuar, prandaj dhe pa asnjë rezervë të vetme, BDI e përkrah këtë ligj si një përpjekje e radhës për t’i arritur të gjitha këto, por edhe për të hapur derën evropiane për vendin tonë”, theksojnë nga partia e Ahmetit, BDI.
