Pavarësisht spekulimeve se Barcelona mund ta rikthejë Samuel Umtitin nga huazimi pas largimit të Gerard Piques, kjo duket se nuk do të ndodhë.
Francezi u largua nga “Camp Nou” gjatë verës për t’iu bashkuar Lecces në formë huazimi.
Siç raportohet nga “Sport”, vendimi befasues i Piques për t’u pensionuar nga futbollit ka shtuar zërat që Barcelona mund të tërheqë Umtitin nga huazimi i tij para kohe.
Por, sipas mediumit spanjoll, kjo nuk do të ndodhë. Barça thuhet se preferon që francezi të shfrytëzojë sa më shumë kohën e tij në Itali dhe të fitojë një formë fizike shumë të nevojshme, pas disa vitesh të vështira, të dominuara nga lëndime të ndryshme.
28-vjeçari me Barcelonën ka kontratë të vlefshme deri më 30 qershor 2026.
Marrëveshja për huazimin e Umtitit te Lecce skadon pas përfundimit të sezonit, teksa nuk ka ndonjë opsion blerjeje apo detyrim blerje të përfshirë në të.
