Mandatari për kryeministër i Malit të Zi, Dritan Abazoviq, ka thënë se do të shqyrtojë futjen në iniciativën e Ballkanit të Hapur, pasi që e konsideron si shtyllë të politikës së jashtme të SHBA-së në Ballkanin Perëndimor.
Presidenti i Malit të Zi, Milo Gjukanoviq, ka propozuar liderin e Lëvizjes Qytetare URA, ish-zëvendëskryeministër, Dritan Abazoviq, për mandatar të Qeverisë së 43-të të Malit të Zi.
Abazoviq ka folur për qasjen në politikën e jashtme të Malit të Zi nëse ai vjen në pushtet.
“Ne do të shqyrtojmë iniciativat rajonale. Ekzistojnë tre shtylla të politikës së jashtme të SHBA-së në Ballkanin Perëndimor: BE, NATO dhe BalkanOpen”, ka shkruar ai në Twitter.
Nisma OpenBalkan ka filluar para disa viteve dhe anëtarë janë Shqipëria, Serbia dhe Maqedonia e Veriut.
Mali i Zi tashmë është anëtar i NATO-s, por nuk është anëtar i BE-së sikur që nuk janë as 5 shtetet tjera të Ballkanit Perëndimor.
