Prej sot, kolektori për mbrojtjen e Liqenit të Ohrit është vënë përsëri në funksion. Rehabilitimi filloi në dhjetor të vitit të kaluar dhe ka përfunduar plotësisht, me mjete të siguruara nga Qeveria, e cila ka marrë përsipër plotësisht detyrimin për të riparuar dhe mirëmbajtur sistemin e rëndësisë së jashtëzakonshme për mbrojtjen fizike të Liqenit të Ohrit. Kjo u kumtua sot nga ministrja e Mbrojtjes Radmilla Shekerinska nga Ohri dhe bartësja e listës në NJ.Z 5 të koalicionit “Mundemi”, të udhëhequr nga LSDM-ja.
“Rehabilitimi i sistemit të kolektorit është çështje që u vendos nën qilim për 11 vite, Liqeni i Ohrit u harrua. Ne kemi treguar vendosmëri për të ruajtur statusin e UNESKO-s të Ohrit, kemi demonstruar vendosmëri për të investuar në mbrojtjen e mjedisit”, tha Shekerinska.
Ajo theksoi se qeveria e udhëhequr nga LSDM-ja është gjendur në situatë të sistemit të lënë pas dore, tubacion të bllokuar të betonit, me më shumë se 15 stacione të dëmtuara të pompimit.
Me rehabilitim, janë pastruar kilometra nga tubacioni, është instaluar shtresë e brendshme prej tre kilometrash tubash në pjesët më kritike të sistemit dhe janë riparuar plotësisht 18 stacione pompimi, përfshirë pompën hyrëse në stacionin e pastrimit. Sipas të dhënave, çdo ditë derdheshin tetë mijë metra kub fekale nga pikat kritike të sistemit në liqen dhe në Drinin e Zi.
Shekerinska gjithashtu rikujtoi për aktivitetet e kryera për çlirimin e bregut të liqenit nga ndërtimet joligjore./MIA
