Dështon ‘kurthi’ diplomatik i Putinit, Evropa shfaqet e bashkuar në mbështetje të Ukrainës

Liderët evropianë kanë reaguar me një qëndrim të përbashkët ndaj përpjekjes së presidentit rus, Vladimir Putin, për të hapur një kanal të ri negociatash në Moskë.

Ftesa e tij erdhi pikërisht në momentin kur përfaqësuesit evropianë po përgatiteshin të takoheshin në Berlin në kuadër të koalicionit të të gatshmëve.

Synimi i Putinit ishte të rikthente përçarjet mes vendeve evropiane dhe të dobësonte mbështetjen perëndimore për Ukrainën. Por përgjigjja e Evropës ishte e prerë: nuk do të ketë negociata që anashkalojnë Ukrainën.

Kancelari gjerman Friedrich Merz deklaroi se Evropa është e gatshme të diskutojë me Rusinë, por negociatat duhet të zhvillohen në një format që përfshin Ukrainën, Rusinë, Evropën dhe Shtetet e Bashkuara.

Ai theksoi se kushtet evropiane përfshijnë një armëpushim përgjatë vijës së kontaktit, respektimin e së drejtës së Ukrainës për të ndjekur rrugën e saj drejt integrimit evropian dhe mbështetjen për rindërtimin e vendit.

Në këmbim, sipas Merz, Evropa mund të shqyrtojë heqjen graduale dhe të kushtëzuar të sanksioneve ndaj Rusisë.

Ndërkohë, presidenti francez Emmanuel Macron hodhi në tryezë edhe çështjen e anëtarësimit të Ukrainës në NATO, duke deklaruar se përballë qëndrimeve maksimaliste të Moskës ka ardhur koha që kjo mundësi të rikthehet në diskutim.

Edhe presidentja e Komisionit Evropian, Ursula von der Leyen, përcolli një mesazh të qartë: vetëm përmes forcës dhe vendosmërisë mund të arrihet një paqe e drejtë dhe e qëndrueshme.

Qëndrimi i përbashkët evropian u vu re edhe nga i dërguari i presidentit amerikan Donald Trump, Jared Kushner, i cili pranoi se Evropa është e fortë dhe e bashkuar në mbështetje të Ukrainës.

Mesazhi i Berlinit për Moskën duket i qartë: Evropa është e gatshme për diplomaci, por jo për një marrëveshje që vendos të ardhmen e Ukrainës pa vetë ukrainasit.

/tvklan.al