Pamje të reja nga sulmi i 24 shtatorit 2023 në Banjskë të Zveçanit zbulojnë lëvizjet e grupit të armatosur serb, momentet e bllokimit të rrugës dhe ardhjen e automjeteve të tjera në fshat, pak para përballjes me Policinë e Kosovës.
Ora shënonte 02:09 të mëngjesit, kur dy kamionë që do të përdoreshin për bllokimin e rrugës kishin hyrë në fshatin Banjskë.
Këto pamje dokumentojnë një pjesë të zhvillimeve të asaj nate, kur grupi i armatosur serb ndërmori sulmin që përfundoi me rënien në krye të detyrës të rreshterit të Policisë së Kosovës, Afrim Bunjaku.
Ora 02:09 – Kamionët hyjnë në Banjskë dhe bllokojnë rrugën
Sipas kronologjisë së paraqitur në materialin filmik, dy kamionët hynë në fshat në orën 02:09 dhe u përdorën për të bllokuar rrugën që çon drejt pjesës së brendshme të Banjskës dhe manastirit.
Pas vendosjes së kamionëve, drejtuesit e tyre u kthyen në drejtim të lokacionit të njohur si “Fontana”.

Lëvizjet e personave të armatosur pas bllokimit të rrugës
Ndërkohë që rruga ishte bllokuar dhe Policia e Kosovës ishte njoftuar për situatën, pamjet tregojnë persona të armatosur dhe të uniformuar duke lëvizur në këmbë drejt pjesës së brendshme të fshatit.
Ata shihen duke lëvizur në drejtim të zonës ku ishte vendosur bllokada, ndërsa situata po përshkallëzohej.

Gjatë sulmit ndaj Policisë së Kosovës, në krye të detyrës ra rreshteri Afrim Bunjaku, i cili më pas u shpall Hero i Kosovës.
Policia aktivizon njësitë speciale pas sulmit
Pas sulmit, Policia e Kosovës aktivizoi njësitë e saj të specializuara, përfshirë Njësinë e Specializuar Intervenuese (NjSI), të njohur edhe si FIT.
Pjesëtarët e kësaj njësie u nisën drejt veriut të Kosovës për t’iu përgjigjur situatës së krijuar në Banjskë.
Operacioni që pasoi do të shënonte një nga ndërhyrjet më të rëndësishme të Policisë së Kosovës në përballje me një grup të organizuar dhe të armatosur.


Ora 03:31 – Mbërrijnë automjetet e tjera të grupit
Derisa njësitë policore ishin nisur në drejtim të Banjskës, në orën 03:31 në fshat mbërriti edhe një pjesë tjetër e grupit të armatosur.
Sipas materialit të publikuar, në krye të kolonës ishin dy automjete të markës Mercedes, të cilat raportohet se ishin në pronësi të Milan Radoiçiqit.
Radoiçiq është akuzuar nga autoritetet e Kosovës si drejtues i grupit të përfshirë në sulmin e 24 shtatorit 2023.

Rreth 15 minuta më vonë, grupi u nis në drejtim të manastirit të Banjskës, ku dyshohet se pjesëtarët e tij u rigrupuan dhe vazhduan veprimet kundër Policisë së Kosovës.
Çfarë ndodhi gjatë përballjes dhe si u mor Banjska nën kontroll?
Pamjet e publikuara paraqesin vetëm një pjesë të ngjarjeve që u zhvilluan gjatë asaj nate dhe mëngjesit të 24 shtatorit 2023.
Por përballja e Policisë së Kosovës me grupin e armatosur ngre edhe disa pyetje që vazhdojnë të jenë në qendër të interesimit publik:
- Si u zhvillua përballja deri në marrjen nën kontroll të Banjskës nga Policia e Kosovës?
- Sa pjesëtarë të grupit të armatosur dyshohet se humbën jetën, përtej numrit të konfirmuar zyrtarisht?
- A pati një korridor largimi drejt Serbisë dhe çfarë dihet për këtë pretendim?
- Cili ishte roli i Njësisë së Specializuar Intervenuese (FIT) gjatë operacionit?
Rrëfimi ekskluziv i një pjesëtari të njësisë elitare
Në një rrëfim ekskluziv, një pjesëtar i Njësisë së Specializuar Intervenuese rikthen në kujtesë momentet e operacionit në Banjskë.
Ai tregon përjetimet dhe dëshmitë e tij nga brenda operacionit, që nga momentet e para të angazhimit e deri te marrja nën kontroll e territorit nga Policia e Kosovës.
Rrëfimi sjell këndvështrimin e një pjesëtari që ishte përfshirë drejtpërdrejt në operacion, duke trajtuar vendimmarrjen, rrezikun dhe përgjegjësinë e forcave policore në terren.
Është një rrëfim për detyrën, sakrificën, kujtesën dhe ngjarjet që shënuan 24 shtatorin 2023 në Banjskë.
Shikoni pamjet dhe rrëfimin nga Banjska
Nëse videoja nuk shfaqet, klikoni këtu për ta parë në Facebook.



