Tregtia e shërbimeve në Kinë ruajti një ritëm të shpejtë rritjeje gjatë nëntë muajve të parë të vitit 2026, ndërsa janë ndërmarrë hapa për të promovuar forcat e reja nxitëse të tregtisë së jashtme dhe hapjen e nivelit të lartë.
Sipas Ministrisë së Tregtisë, importet dhe eksportet e shërbimeve arritën në 5.77 trilionë juanë (rreth 858.89 miliardë dollarë amerikanë) në periudhën janar-shtator, duke shënuar një rritje prej 8.5 për qind krahasuar me të njëjtën periudhë të vitit të kaluar. Eksportet u rritën me 14.8 për qind, ndërsa importet me 4.8 për qind, duke sjellë një deficit në tregtinë e shërbimeve prej 1.23 trilionë juanësh.
Ky rezultat u mbështet nga një rritje e ndjeshme në shërbimet e transportit, si dhe nga përparimi i qëndrueshëm në sektorët që kërkojnë njohuri intensive. Shërbimet e transportit kryesuan ndër të gjitha kategoritë, me një rritje prej 33.9 për qind gjatë kësaj periudhe. Shërbimet me njohuri intensive, të cilat përbënin 43.9 për qind të vëllimit të përgjithshëm të tregtisë së shërbimeve, shënuan një shtim të qëndrueshëm prej 7.4 për qind.
Këto shifra pasqyrojnë një ndryshim më të gjerë në strukturën tregtare të Kinës, që po kalon drejt një ekonomie të orientuar më shumë nga konsumi dhe risitë.
Ekspertët theksojnë që zhvillimi i tregtisë së shërbimeve është thelbësor për krijimin e epërsive të reja konkurruese në tregtinë ndërkombëtare, për nxitjen e një ekonomie më të hapur dhe për mbështetjen e zhvillimit me cilësi të lartë.
Mbështetja përmes politikave është forcuar. Plani i 15-të Pesëvjeçar (2026-2030) bën thirrje për zhvillimin e fuqishëm të tregtisë së shërbimeve, ndërsa raporti i punës së qeverisë për vitin 2026 zotohet për përmirësimin e standardeve kombëtare në sektorin e shërbimeve dhe për zhvillimin e markës “Shërbimet e Kinës”. Në prill, Ministria e Tregtisë nisi një plan për zhvillimin e zonave kombëtare demonstruese për tregtinë e shërbimeve në 16 qytete, duke përfshirë Pekinin, Tianjin-in dhe Shangain, si edhe provincën Hainan. Qëllimi është krijimi i grupimeve kyçe të industrisë së shërbimeve dhe përmirësimi i ndjeshëm i nivelit të liberalizimit të tregtisë së shërbimeve deri në vitin 2035.
Rritja e tregtisë së shërbimeve të Kinës ka gjithashtu një rëndësi globale.
Li Bin, zv.kreu i Administratës Shtetërore të Këmbimit Valutor, deklaroi se importet e shërbimeve të Kinës arritën në mbi 620 miliardë dollarë amerikanë në vitin 2025. Ato përfshijnë sektorë si udhëtimet, pronësia intelektuale, transporti dhe shërbimet e biznesit, duke e bërë Kinën importuesen e dytë më të madhe të shërbimeve në botë.
Li theksoi se rritja e qëndrueshme e importeve të shërbimeve nga Kina ka mbështetur fuqimisht zhvillimin e tregtisë globale të shërbimeve, duke nxitur në mënyrë efektive punësimin dhe rritjen ekonomike në vende të tjera.
