Kryeministri Edi Rama i cilësoi protestuesit e rinj si të lidhur me ekstremizmin dhe shërbime të huaja, si Rusia dhe Irani, pa paraqitur prova konkrete, ndërsa premtoi shpërblim prej 2500 eurosh për forcat e policisë. Deklaratat e tij erdhën në një kohë kur Policia e Shtetit po përballet me akuza për përdorim joproporcional të forcës ndaj protestuesve.
Rama paralajmëroi pasoja financiare dhe administrative për protestuesit, duke deklaruar se familjet e të miturve do të paguajnë dëmet, ndërsa studentët mund të humbasin bursat dhe përfitimet nga arsimi falas. Ai justifikoi ndërhyrjet policore, duke pretenduar se kushdo që ndodhet në një manifestim të dhunshëm është objekt i policisë, edhe nëse nuk ushtron vetë dhunë.
Shkrimtari Fatos Lubonja i krahasoi deklaratat e kryeministrit me retorikën e Enver Hoxhës, duke paralajmëruar se nxitja e policisë me fjalime dhe shpërblime rrezikon ta çojë vendin drejt një shteti policor. Edhe studiuesi Nebi Bardhoshi vlerësoi se portretizimi i protestuesve si agjentë dhe terroristë legjitimon dhunën policore dhe mund të thellojë përplasjen shoqërore.
Ndërkohë, Kryeministria deklaroi për BIRN se fjalët e Ramës duhen parë në kontekstin e akteve të dhunshme dhe jo të së drejtës për protestë, duke këmbëngulur se ndërhyrjet policore duhet të jenë në përputhje me ligjin dhe parimin e proporcionalitetit.
