Ekstremistët e djathtë në Britaninë e Madhe po shqyrtojnë gjithnjë e më shpesh mundësinë e sulmeve terroriste ndaj migrantëve, myslimanëve, qendrave të emigracionit dhe hoteleve ku strehohen azilkërkuesit, ka paralajmëruar drejtori i shërbimit britanik të sigurisë së brendshme MI5, Ken McCallum.
Sipas tij, kalimi nga pikëpamjet radikale të së djathtës ekstreme drejt dhunës përbën një nga tendencat më shqetësuese të vitit të fundit.
Paralajmërimi vjen në kohën kur Britania po përballet me protesta të ashpra kundër emigracionit dhe nivele rekord të veprave penale të motivuara nga urrejtja racore dhe fetare, raporton “The Guardian”.
MI5 hetoi edhe një fëmijë 13-vjeçar
Shqetësim i veçantë për autoritetet britanike mbetet radikalizimi i të rinjve.
McCallum zbuloi se gjatë këtij viti MI5 kishte hetuar edhe një 13-vjeçar të radikalizuar. Ai kujtoi rastin e një 16-vjeçari nga Inverclyde, i cili vitin e kaluar u dënua me dhjetë vjet burg pasi pranoi se kishte planifikuar një sulm me mjete zjarrvënëse ndaj një qendre myslimane në Greenock, me synim vrasjen e shumë personave.
Irani zgjeron operacionet në Britani
Drejtori i MI5 paralajmëroi edhe për intensifikimin e aktiviteteve të Iranit, duke theksuar se Teherani po synon objektiva gjithnjë e më të ndjeshme, përfshirë instalime ushtarake si baza ajrore RAF Fairford në Gloucestershire.
Sipas tij, operacionet e kundërzbulimit të lidhura me Iranin kanë çuar në më shumë se 50 arrestime në Britaninë e Madhe gjatë vitit të fundit.
Disa nga kërcënimet, sipas McCallum, kanë pasur në shënjestër komunitetet hebraike dhe kanë përfshirë plane të dyshuara për sulme terroriste dhe zjarrvënie në sinagoga, objekte biznesi dhe automjete të ambulancës.
Rusia, “agresori numër një”
McCallum e cilësoi Rusinë si “agresorin numër një” ndër kërcënimet shtetërore me të cilat përballet Britania.
Ai deklaroi se Kremlini vazhdon aktivitetet kundër vendeve perëndimore, duke përfshirë plane për atentate, kërcënime me eksplozivë dhe sulme kibernetike.
Sipas tij, disa prej këtyre aktiviteteve po i afrohen kufirit të luftës konvencionale.
Shefi i MI5 iu referua edhe referendumit të Brexit-it të vitit 2016, duke thënë se Moska ishte përpjekur të ndikonte përmes përmbajtjeve kundër Bashkimit Evropian në RT dhe Sputnik, si dhe përmes profileve të lidhura me të ashtuquajturat fabrika të trollëve.
Megjithatë, ai theksoi se duhet bërë dallim ndërmjet përpjekjeve për ndikim dhe rezultateve reale të tyre.
MI5 krijon qendër për kërcënimet nga inteligjenca artificiale
Shërbimi britanik i sigurisë do t’i kushtojë vëmendje të veçantë edhe rreziqeve nga keqpërdorimi i inteligjencës artificiale.
McCallum shprehu shqetësimin se shtetet armiqësore dhe organizatat terroriste mund ta përdorin këtë teknologji për zhvillimin e armëve të reja biologjike vdekjeprurëse.
Për këtë arsye, MI5 po krijon një qendër të re për vlerësimin e kërcënimeve nga inteligjenca artificiale, e cila do të dallojë rreziqet reale nga pretendimet e ekzagjeruara ose të pabazuara.
Ai paralajmëroi se kërcënimet nga shtetet armiqësore janë katërfishuar gjatë dekadës së fundit dhe tashmë zënë pothuajse të njëjtën hapësirë në punën e MI5 sa lufta tradicionale kundër terrorizmit.
McCallum paralajmëroi gjithashtu për rritjen e dhunës ndaj politikanëve, grupeve fetare dhe komuniteteve të tjera shoqërore.
“Jemi futur sërish në një epokë të re të sigurisë kombëtare”, përfundoi ai.
The Guardian
