Ish-ministri i Jashtëm, Bujar Osmani, i është kundërpërgjigjur kryeministrit Hristijan Mickoski për Protokollin me Bullgarinë, duke vënë në pikëpyetje arsyet e kritikave ndaj tij.
Osmani rikujtoi se dokumenti ishte miratuar unanimisht nga Qeveria dhe kishte marrë mbështetjen e 67 deputetëve në Kuvend. Ai përmendi edhe një dokument të vitit 2019, të nënshkruar nga një ministër maqedonas, për të cilin, sipas tij, nuk ngrihen të njëjtat kundërshtime.
„Çfarë ndryshoi – protokolli apo përkatësia etnike e ministrit që e nënshkroi?“, pyeti Osmani.
Ai akuzoi se debati ngre pikëpyetje për mënyrën se si trajtohen qytetarët në bazë të përkatësisë etnike, duke shtuar se përgjegjësia e një kryeministri është të përfaqësojë të gjithë qytetarët, pa dallime etnike.
