Çfarë ndodhi me 38-vjeçaren nga Tetova? Më 12 gusht 2007, Beti Grnçarovska u zhduk në Shkup dhe prej atëherë fati i saj mbetet një mister i pazbardhur.
Kanë kaluar 19 vite nga zhdukja e saj, ndërsa pyetjet që rëndojnë mbi rastin ende nuk kanë marrë përgjigje.
Beti kishte shitur dyqanin e saj në Tetovë dhe po përgatitej të largohej për në Split të Kroacisë, ku synonte të niste një jetë të re. Atë ditë u largua nga shtëpia me pesë çanta, ndërsa njëra prej tyre, sipas familjes, përmbante rreth 140 mijë euro.
Para nisjes, ajo i kishte thënë nënës së saj, Ratka Kolevës, se në Shkup do ta priste një mik nga Tetova. Ajo nuk kishte pranuar që nëna dhe vëllai ta shoqëronin, duke u thënë se nuk dëshironte përshëndetje.
Beti u nis me taksi drejt Shkupit.
Telefonata e fundit erdhi nga Shkupi. Ajo telefonoi familjen dhe tha se kishte mbërritur. Shoferi i taksisë e kishte lënë pranë qendrës tregtare „Beverly Hills“.
Prej atij momenti, gjurmët e saj humbën.
Personi me të cilin Beti supozohej të takohej në Shkup dhe më pas të udhëtonte drejt Kroacisë, mohoi se kishte një marrëveshje të tillë dhe deklaroi se nuk dinte asgjë për zhdukjen e saj.
Nëna e Betit, e cila vite më parë foli edhe në media për rastin, ishte e bindur se vajza e saj ishte rrëmbyer. Ajo tregonte se Beti ishte e vendosur për të ndërtuar një jetë të re në Kroaci dhe kishte plane edhe për familjen e saj.
Megjithatë, as pas 19 vitesh nuk ka një përgjigje përfundimtare se çfarë ndodhi me të.
Sipas të dhënave të publikuara nga Ministria e Punëve të Brendshme për personat e zhdukur, Beti Grnçarovska kishte lindur më 21 janar 1968 në Tetovë dhe ishte e gjatë rreth 175 centimetra, me flokë të zeza dhe protezë dentare.
Më 12 gusht 2007 ajo u zhduk në Shkup.
Pesë çanta.
140 mijë euro.
Një telefonatë e fundit.
Dhe një zhdukje që, pas 19 vitesh, vazhdon të mbetet pa përgjigje.
