Besjan Rexhepi, që udhëheq Parlamentin Studentor në UEJL, ka dalë me një kundërpërgjigje pas ftesës së ministrit të Drejtësisë, Jeton Shasivari, për një tryezë dialogu rreth çështjes së Jurisprudencës. Sipas Rexhepit, studentët nuk kanë nevojë të binden sepse qëndrimi i tyre është i formuar dhe i palëkundur.
Ai theksoi se baza e kërkesës së tyre nuk qëndron mbi opinione apo lojëra politike, por mbi tekstin e Kushtetutës së Maqedonisë së Veriut dhe legjislacionin në fuqi që sanksionon të drejtat gjuhësore dhe barazinë qytetare. “Për këtë arsye, nuk ka asnjë justifikim për ta zgjatur më tej këtë problem. Rruga e zgjidhjes është konkrete, plotësisht e realizueshme dhe kërkon thjesht vullnet institucional për t’u vënë në jetë,” deklaroi ai.
Rexhepi konfirmoi se e sheh me sy të mirë takimin e paralajmëruar, por paralajmëroi se pret më shumë se një formalitet. Ai kërkoi që kjo mbledhje të shënojë një kthesë reale drejt finalizimit të çështjes. Duke folur në emër të strukturës studentore, ai siguroi se do të vijojnë ta mbrojnë këtë kauzë me ndershmëri dhe vendosmëri.
“Barazia gjuhësore dhe respekti për të drejtat tona nuk janë tema që duhet të kalojnë pezull nga njëri mandat qeverisës në tjetrin. Ne kërkojmë thjesht tri gjëra: trajtim të barabartë, zbatim korrekt të ligjeve dhe respektim të plotë të të drejtave studentore,” përfundoi kreu studentor.
