Gjykata Federale Administrative ka mbështetur deportimin e një shtetasi të Maqedonisë së Veriut. Zyra Federale e Policisë e akuzon të përmendurin për mbështetje të organizatës terroriste “Shteti Islamik” (IS), transmeton albinfo.ch
Gjykata e konsideroi masën ndaj tij si proporcionale dhe e hodhi poshtë ankesën e të dënuarit, sipas vendimit të publikuar nga Gjykata Federale Administrative të premten.
Shtetasit të Maqedonisë i është ndaluar hyrja në Zvicër dhe Lihtenshtajn për 20 vjet.
Zyra Federale e Policisë (Fedpol) kishte urdhëruar deportimin e tij në vitin 2022. Ajo supozon se shtetasi i Maqedonisë së Veriut është i radikalizuar, shkruan sda.ch. Ai përhapi ideologjinë e “Shtetit Islamik” në mediat sociale dhe ofroi mbështetje logjistike dhe financiare për organizatën terroriste, thuhet në vendim.
I përmenduri kishte hyrë në Zvicër në vitin 2014. Ai është i martuar me një grua nga Kosova dhe ka tre fëmijë, përcjell albinfo.ch. Të gjithë anëtarët e familjes kanë leje qëndrimi të përhershme (Vizë C).
Gjykata Federale Administrative konfirmoi se deportimi i tij përbën një shkelje të jetës së tij familjare. Megjithatë, familja mund ta vizitojë atë në Maqedoninë e Veriut. Interesi publik në deportimin e tij është më i rëndësishëm se interesi privat i burrit për të qëndruar në Zvicër.
Vendimi i Gjykatës Federale Administrative është përfundimtar dhe nuk mund të apelohet në Gjykatën Supreme Federale. Procedurat e veçanta penale kundër burrit nga Zyra e Prokurorit Federal janë ende në pritje.
