Elon Musk, njeriu më i pasur në botë, po përgatitet të shpenzojë shuma të mëdha për të ndihmuar republikanët të ruajnë kontrollin e Kongresit në zgjedhjet e mesmandatit të nëntorit, raportoi të enjten Axios.
Sipas raportimit, ky investim do të ringjallë operacionin politik që e bëri Musk-un financuesin më të madh të rikthimit të Donald Trump në pushtet gjatë zgjedhjeve presidenciale të vitit 2024.
Miliarderi i teknologjisë planifikon të riaktivizojë America PAC, organizatën politike që shpenzoi më shumë se 260 milionë dollarë për të mbështetur fushatën e Trump, sipas burimeve të njohura me planin, të cituara nga Axios.
Grupi pritet të përqendrohet në: fushata derë më derë, reklama dixhitale, dërgimin e materialeve me postë, me synimin për të mobilizuar votuesit konservatorë që zakonisht marrin pjesë më pak në zgjedhjet jashtë atyre presidenciale.
Musk nuk ka bërë të ditur se sa para planifikon të shpenzojë. America PAC nuk iu përgjigj menjëherë kërkesës për koment.
Ndërhyrja e tij mund të jetë një ndihmë e rëndësishme për republikanët, në një kohë kur popullariteti i Presidentit Donald Trump është dobësuar, shqetësimet për ekonominë janë shtuar dhe kundërshtimi ndaj luftës me Iranin rrezikon shumicën e ngushtë republikane në Dhomën e Përfaqësuesve dhe Senat.
Komitetet republikane dhe grupet aleate tashmë kanë një avantazh të madh financiar ndaj demokratëve, ndërsa organizata MAGA Inc. e Trumpit ka grumbulluar qindra milionë dollarë.
Marrëdhënia me Trump
Rikthimi i Musk në politikë vjen pas një marrëdhënieje të trazuar me Trump.
Pasi shërbeu për një periudhë të shkurtër në administratë si drejtues i Departamentit të Efiçencës Qeveritare (DOGE), ai u përplas publikisht me presidentin për legjislacionin republikan mbi shpenzimet dhe madje la të kuptohej se mund të krijonte një parti të tretë.
Më pas ai rifilloi financimin e kauzave republikane, duke dhënë donacione shumëmilionëshe për kandidatë individualë dhe organizata konservatore.
Polemika ligjore
Aktiviteti politik i Musk ka sjellë edhe polemika ligjore.
Një gjykatës federal urdhëroi Musk të dëshmojë në proceset gjyqësore ku America PAC akuzohet se ka mashtruar votuesit me premtimin për të dhënë nga 1 milion dollarë çdo ditë për votues të regjistruar që firmosnin një peticion politik para zgjedhjeve të vitit 2024.
Paditësit pretendojnë se fituesit nuk u përzgjodhën rastësisht, siç kishte deklaruar Musk, por u zgjodhën sepse mund të shërbenin si zëdhënës efektivë të organizatës.
Një komision në Wisconsin arriti gjithashtu në përfundimin se pagesa të ngjashme të premtuara gjatë fushatës për Gjykatën Supreme të shtetit mund të kenë shkelur ligjet kundër ryshfetit.
Roli i miliarderëve në zgjedhje
Rikthimi i Musk nxjerr në pah ndikimin gjithnjë e më të madh të donatorëve ultra të pasur në politikën amerikane.
Familje miliarderësh kanë kontribuar tashmë me qindra milionë dollarë për zgjedhjet e vitit 2026, ku pjesa më e madhe e fondeve ka shkuar për kandidatët dhe organizatat republikane, sipas analizave të mediave amerikane mbi dokumentet e financimit zgjedhor.
Edhe demokratët mbështeten nga donatorë të pasur, si George Soros, Alex Soros, Reid Hoffman dhe Michael Bloomberg, por deri tani miliarderët e lidhur me republikanët kanë dhënë shumë më tepër fonde.
Sipas Axios, fushata e America PAC do të drejtohet nga këshilltari politik i Musk, Chris Young, dhe do të koordinohet me organizata të tjera republikane, duke u lejuar atyre të përqendrohen më shumë në reklamat televizive.
James Blair, këshilltar politik i Trump, deklaroi për Axios: “America PAC ishte një partner thelbësor në operacionin tonë historik të vitit 2024 dhe rikthimi i tyre për zgjedhjet e vitit 2026 është një shtysë e madhe për republikanët në të gjithë vendin.”
© SYRI.net
