Partia e ekstremit të djathtë Alternativa për Gjermaninë (AfD) ka zgjeruar më tej epërsinë ndaj bllokut konservator CDU/CSU të kancelarit Friedrich Merz, sipas një sondazhi të publikuar nga instituti YouGov.
Rezultatet tregojnë se AfD gëzon aktualisht mbështetjen e 29 për qind të votuesve, një pikë përqindjeje më shumë se në matjen e mëparshme. Ndërkohë, CDU/CSU ka humbur dy pikë dhe ka zbritur në 20 për qind.
Diferenca prej nëntë pikësh përqindjeje përbën avantazhin më të madh të regjistruar deri tani mes dy forcave politike në sondazhet kombëtare.
Në vendin e tretë renditen të Gjelbrit me 14 për qind, ndërsa Partia Socialdemokrate (SPD), pjesë e koalicionit qeverisës, mbështetet nga 12 për qind e të anketuarve. Me të njëjtin nivel mbështetjeje renditet edhe partia e Majtë.
Demokratët e Lirë (FDP) marrin 5 për qind, ndërsa Aleanca Sahra Wagenknecht (BSW) mbetet në 4 për qind, nën pragun elektoral.
Edhe sondazhe të tjera të publikuara së fundmi tregojnë një epërsi të qëndrueshme të AfD-së. Në matjen më të fundit të institutit Insa, AfD rezulton me 29 për qind kundrejt 22 për qind të CDU/CSU-së, ndërsa sondazhi i RTL/ntv e rendit partinë e ekstremit të djathtë në 27 për qind dhe konservatorët në 21 për qind.
Rezultatet shtojnë presionin mbi kancelarin Friedrich Merz, popullariteti i të cilit, sipas disa sondazheve të publikuara në muajin maj, ka rënë në nivelet më të ulëta që nga marrja e detyrës.
