Presidentja e Komisioni Evropian, Ursula von der Leyen, ka reaguar ashpër pas rrëzimit të një droni rus në një pallat apartamentesh në Rumani, duke e cilësuar sulmin si një tjetër përshkallëzim të agresionit të Rusi ndaj territorit të Bashkimit Evropian.
Me anë të një postimi në rrjetin social “X”, Von der Leyen deklaroi se agresioni i Rusisë ka kaluar edhe një kufi tjetër, duke iu referuar sulmit me dron që goditi zonën e banuar, ku si pasojë dy persona mbetën të lënduar dhe rreth 70 të tjerë u detyruan të evakuohen.
Presidentja e Komisionit Evropian theksoi më tej se Bashkimi Evropian do të vazhdojë të qëndrojë në solidaritet të plotë me Rumaninë dhe qytetarët e saj, ndërsa paralajmëroi masa të reja kundër Moskës.
“Lufta e agresionit e Rusisë ka kaluar një vijë tjetër. Një inkursion me dron rus goditi një zonë të dendur me popullsi në Rumani, duke plagosur civilë në territorin e BE-së. Ne qëndrojmë në solidaritet të plotë me Rumaninë dhe popullin e saj. Ndërsa vazhdojmë të forcojmë sigurinë dhe parandalimin tonë, veçanërisht në kufirin tonë lindor, do të vazhdojmë të rrisim presionin mbi Rusinë. Po përgatisim një paketë të 21-të sanksionesh,” tha Von der Leyen në “X”.
Lidhur me ngjarjen, Ministria e Mbrojtjes e Rumanisë tha se droni u gjurmua nga radari në hapësirën ajrore rumune dhe u rrëzua në çatinë e një ndërtese në Galați të premten. Përplasja shkaktoi zjarr, dy persona të lënduar dhe disa të tjerë u evakuuan. Ministria e Jashtme e Rumanisë e përshkroi incidentin me dron si një përshkallëzim të rëndë dhe të papërgjegjshëm nga Rusia.
Ata njoftuan se vendi do të merrte masat e nevojshme diplomatike për t’iu përgjigjur asaj që e përshkroi si një shkelje serioze të së drejtës ndërkombëtare dhe hapësirës së saj ajrore. Sulmin rus e dënoi edhe NATO, duke theksuar se aleanca do të forcojë mbrojtjen e saj kundër të gjitha kërcënimeve, përfshirë dronët.
Nga ana tjetër sekretari i përgjithshëm i OKB-së, António Guterres, i tha të enjten Këshillit të Sigurimit të OKB-së se më shumë civilë ishin vrarë në luftën Rusi-Ukrainë në katër muajt e parë të këtij viti sesa në të njëjtën periudhë të tre viteve të fundit. Guterres bëri thirrje për më shumë diplomaci, ulje të menjëhershme të tensioneve dhe një armëpushim të plotë dhe të pakushtëzuar.
Rusia ka përdorur raketa balistike me rreze të gjatë veprimi dhe dronë për të dëmtuar rrjetin elektrik të Ukrainës dhe për të goditur qytete, dhe Ukraina është duke u përgatitur për bombardime të mëtejshme të rënda. Presidenti ukrainas, Volodymyr Zelenskyy, tha të enjten se po i bënte presion SHBA-së që të siguronte më shumë raketa mbrojtëse ajrore Patriot që mund të kundërshtonin sulmet ruse me raketa balistike.
© SYRI.net
