Janë të rinj, të suksesshëm dhe me pasuri që arrijnë miliona, madje edhe miliarda franga zvicerane.
Revista financiare zvicerane “Bilanz” ka publikuar listën e 100 personave më të pasur nën moshën 40-vjeçare në Zvicër, transmeton albinfo.ch.
Në krye të renditjes për herë të parë ndodhet David Wertheimer, 39 vjeç, trashëgimtar i familjes së njohur të Chanel, me një pasuri të vlerësuar mes 5 dhe 6 miliardë frangash. Ndërsa sipërmarrësi më i pasur i ri është Hany Rashwan, themelues në sektorin e kriptovalutave dhe fintech, me pasuri deri në 600 milionë franga.
Në listë gjenden edhe emra të njohur të sportit, si basketbollisti Clint Capela dhe ish-futbollisti Ivan Rakitić, të cilët kanë ndërtuar pasuri prej dhjetëra milionë frangash.
Të tjerë sportistë të njohur në listë janë edhe futbollistët Manuel Akanji, Yann Sommer, Granit Xhaka dhe Xherdan Shaqiri, si dhe hokeisti Kevin Fiala (të gjithë me pasuri të vlerësuar nga 20 deri në 50 milionë franga), ndërsa skiatori Marco Odermatt ka një pasuri të vlerësuar mes 10 dhe 20 milionë frangash.
Pjesë e listës është edhe Edoardo Ermotti, djali i CEO-s së UBS, Sergio Ermotti. 30-vjeçari ka themeluar kompaninë e investimeve “14Peaks Capital”, e fokusuar kryesisht në fintech, dhe pasuria e tij vlerësohet deri në 10 milionë franga.
Sipas raportit, shumë nga të rinjtë super të pasur në Zvicër vijnë nga trashëgimi familjare, ndërsa një pjesë tjetër kanë krijuar pasurinë në teknologji, financë dhe sport.
