Presidenti i SHBA-së, Donald Trump, ka deklaruar se Irani ka “interes të arrijë një marrëveshje”, ndërsa negociatat për programin bërthamor iranian dhe konfliktin në rajon vijojnë pa rezultate konkrete.
Në një intervistë telefonike për transmetuesin francez BFMTV, Trump u shpreh i pasigurt nëse një marrëveshje do të arrihet së shpejti.
“Nuk kam asnjë ide. Nëse nuk e bëjnë, do të kenë një periudhë shumë të keqe. Ata kanë interes të arrijnë një marrëveshje”, tha presidenti amerikan.
Sipas raportimeve mediatike, Trump pritet të vendosë në orët në vijim nëse do të rifillojë sulmet ndaj regjimit iranian, pasi bisedimet për përfundimin e konfliktit dhe adresimin e programit bërthamor të Iranit nuk kanë prodhuar ende rezultate.
Tensionet në rajon mbeten të larta që prej 28 shkurtit, kur SHBA-ja dhe Izraeli nisën sulme ndaj Iranit, duke shkaktuar kundërpërgjigje nga Teherani kundër Izraelit dhe aleatëve amerikanë në vendet e Gjirit. Situata u përkeqësua edhe me mbylljen e Ngushticës së Hormuzit.
Një armëpushim hyri në fuqi më 8 prill me ndërmjetësimin e Pakistanit, por bisedimet në Islamabad nuk arritën të siguronin një marrëveshje të qëndrueshme. Më pas, Trump zgjati armëpushimin për një periudhë të pacaktuar, duke ruajtur bllokadën ndaj anijeve që lëviznin drejt ose nga portet iraniane përmes kësaj rruge strategjike ujore.
