Zëdhënësi kryesor ushtarak i Iranit ka paralajmëruar se Teherani mund të planifikojë sulme ndaj objektivave civile në vende të ndryshme të botës, shkruan Sky News.
Abolfazl Shekarchi deklaroi, sipas televizionit shtetëror iranian, se “nga tani e tutje, bazuar në informacionet që kemi për ju, edhe parqet, zonat rekreative dhe destinacionet turistike kudo në botë nuk do të jenë më të sigurta për ju”.
Këto deklarata rikthejnë shqetësimin e analistëve se, me vazhdimin e luftës, Irani mund t’i rikthehet përdorimit të sulmeve militante jashtë Lindjes së Mesme si një mjet presioni në konflikt.
Që në fazat e hershme të luftës, njësia e inteligjencës e Department of Homeland Security kishte paralajmëruar se Irani mund të synojë territorin amerikan, megjithëse një sulm i madh fizik vlerësohej si pak i mundshëm.
Ndërkohë, edhe në Evropë janë ngritur alarme të ngjashme. Marc Henrichmann, kreu i panelit parlamentar për mbikëqyrjen e shërbimeve sekrete në Gjermani, ka paralajmëruar më herët për mundësinë e sulmeve terroriste jashtë Lindjes së Mesme.
“Masat hakmarrëse, përfshirë ato që mund të kryhen nga qeliza të fjetura iraniane në Evropë, nuk mund të përjashtohen”, ka deklaruar ai për gazetën gjermane Süddeutsche Zeitung.
© SYRI.net
