Ali Larijani ka publikuar një mesazh drejtuar myslimanëve në mbarë botën dhe qeverive të vendeve islame, ku kritikon mungesën e mbështetjes ndaj Iranit në përballjen e tij me Shtetet e Bashkuara të Amerikës dhe Izraelin.
Në deklaratën e tij, Larijani pretendon se Irani është përballur me një agresion “amerikano-sionist” që, sipas tij, ndodhi gjatë negociatave dhe kishte për qëllim dobësimin dhe shpërbërjen e vendit.
Ai thotë se nga sulmet janë vrarë civilë dhe komandantë ushtarakë, si dhe një figurë e rëndësishme e revolucionit islamik.
Sipas Larijanit, pavarësisht këtyre zhvillimeve, populli iranian ka reaguar me rezistencë të fortë kombëtare dhe fetare, duke bërë që, sipas tij, kundërshtarët të përballen me një situatë strategjike, nga e cila e kanë të vështirë të dalin.
Në mesazhin e tij, ai shpreh gjithashtu zhgënjimin për mungesën e mbështetjes nga shumica e vendeve islame. Sipas Larijanit, përveç disa qëndrimeve të kufizuara politike, shumë shtete myslimane nuk kanë qëndruar përkrah Iranit gjatë përballjes me SHBA-të dhe Izraelin.
Ai kritikon gjithashtu disa qeveri të vendeve islame që, sipas tij, e kanë konsideruar Iranin si armik për shkak të sulmeve ndaj bazave amerikane ose interesave amerikane dhe izraelite në territoret e tyre.
Larijani argumenton se Irani nuk mund të qëndrojë pasiv kur bazat amerikane në këto vende përdoren për të sulmuar territorin iranian.
Në deklaratë, ai e përshkruan përballjen aktuale si një konflikt midis SHBA-ve dhe Izraelit në njërën anë dhe Iranit dhe forcave të rezistencës në anën tjetër, duke u bërë thirrje vendeve islame të përcaktojnë qartë se në cilën anë qëndrojnë.
Larijani u bën gjithashtu thirrje qeverive të botës islame të reflektojnë për të ardhmen e rajonit, duke theksuar se uniteti i botës islame mund të garantojë siguri, zhvillim dhe pavarësi për të gjitha vendet e saj.
Sipas tij, Irani nuk synon dominim mbi vendet e tjera myslimane, por bashkëpunim dhe solidaritet përballë sfidave të përbashkëta.
