Një incident i rëndë ka ndodhur mbrëmjen e djeshme në fshatin Jazhincë të Tetovës, ku një zënkë mes dy të rinjve ka përfunduar me dhunë fizike dhe goditje të qëllimshme me automjet.
Sipas raportit zyrtar nga policia e Tetovës, ngjarja ka ndodhur rreth orës 23:00 përpara një lokali në fshat.
Konflikti ka nisur pas një debati verbal mes 18-vjeçarit me iniciale B.B. dhe 22-vjeçarit M.S., të dy banorë të Jazhincës.
Dhunë fizike dhe sulm me automjet
Viktima ka denoncuar në polici se fillimisht është sulmuar fizikisht nga 18-vjeçari. Pas sherrit, ndërsa 22-vjeçari po largohej në këmbë, agresori ka hipur në automjetin e tij të llojit “Opel” me targa të Tetovës dhe e ka goditur atë qëllimisht.
Ndërhyrja e policisë dhe sekuestrimi i mjetit
Efektivët e policisë kanë reaguar menjëherë duke privuar nga liria 18-vjeçarin B.B. Po ashtu, automjeti i përdorur në këtë sulm është sekuestruar nga policia si provë materiale për mjetin e kryerjes së veprës penale.
Nga Ministria e Punëve të Brendshme njoftojnë se rasti po dokumentohet plotësisht dhe ndaj 18-vjeçarit do të ngrihet kallëzim përkatësh penal sipas udhëzimeve të Prokurorit Publik.
