Volodymyr Zelensky flet me Donald Trump, thotë se bisedimet duhet të çojnë në një takim të liderëve me presidentin e Rusisë, Vladimir Putin.
Presidenti ukrainas Volodymyr Zelensky ka zhvilluar një bisedë telefonike të mërkurën me presidentin e SHBA-së, Donald Trump.
Zelensky tha se ai dhe Trump u dakorduan që në takimin e radhës të bisedimeve trepalëshe në mars duhet të çojë në një takim të liderëve të vendeve.
Ai tha se bisedimet trepalëshe mes Ukrainës, Rusisë dhe Shtetet e Bashkuara do të zhvillohen në fillim të muajit të ardhshëm. Negociatorët amerikanë Steve Witkoff dhe Jared Kushner gjithashtu morën pjesë në telefonatë.
“Ne presim që ky takim të krijojë një mundësi për t’i çuar bisedimet në nivelin e liderëve. Presidenti Trump e mbështet këtë renditje hapash”, shkroi Zelensky në rrjetet sociale.
“Kjo është e vetmja mënyrë për t’i zgjidhur të gjitha çështjet komplekse dhe të ndjeshme dhe për t’i dhënë fund përfundimisht luftës”.
Telefonata u zhvillua në prag të një takimi tjetër, vetëm midis negociatorëve ukrainas dhe amerikanë, për të diskutuar rindërtimin pas luftës.
Zelensky tha se dy liderët diskutuan për të dy takimet. Ai falënderoi Shtetet e Bashkuara për “përfshirjen aktive” në procesin e paqes dhe për raketat për sistemet e mbrojtjes ajrore që po ndihmojnë Ukrainën të përballojë sulmet gjatë dimrit.
Duke folur në një konference për shtyp në Kiev më herët të mërkurën, së bashku me kryeministrin norvegjez Jonas Gahr Stoere, Zelensky tha se takimi i së enjtes do të përfshijë diskutimin e një “pakete prosperiteti”.
Zelensky tha se SHBA-ja dëshiron të gjejë një mënyrë për t’i dhënë fund sa më shpejt konfliktit më të madh të Evropës që nga Lufta e Dytë Botërore. Por Moska dhe Kievi mbeten shumë larg në qëndrimet e tyre.
“Sipas mendimit tim, vështirësitë nuk janë në nivelin ushtarak tani. Problemi qëndron te vullneti politik për t’i dhënë fund kësaj lufte dhe te çështja e territoreve”, tha Zelensky.
“Mendoj se bisedimet trepalëshe do të mbahen në fillim të marsit. Nesër, dokumentet ekonomike do të përgatiten në një takim dypalësh midis Ukrainës dhe Shteteve të Bashkuara.
Zelensky gjithashtu tha se pretendimet ruse të martën se Kievi po përpiqej të siguronte armë bërthamore ishin një përpjekje për të ushtruar presion politik ndaj Ukrainës gjatë bisedimeve.
Ai përsëriti se Ukraina nuk ka armë bërthamore dhe i bëri thirrje SHBA-së të reagojë ndaj asaj që e përshkroi si retorikë të rrezikshme ruse.
