Që nga mbrëmë, në rrugën rajonale nga Gostivari në fshatin Çegran, më saktësisht në fshatin Forinë, është vendosur ndalim trafiku për shkak të daljes nga shtrati të lumit Vardar. Trafiku po ridrejtohet nga fshati Çajle në fshatin Çajle e Vjetër dhe më pas në fshatin Forinë, informon LAMM. Rruga për në fshatin German pranë fshatit Stança është gjithashtu e bllokuar, sepse një pemë ka rënë në rrugë dhe aktualisht është e pakalueshme, transmeton Portalb.mk.
Siç raportoi këtë mëngjes LAMM, trafiku në rrugët shtetërore po zhvillohet në rrugë të lagura. Ka reshje të lehta bore në Kriva Pallankë, në vendkalimet kufitare Deve Bair, Dellçevë, Straçin dhe Ponikva, por për momentin nuk paraqet pengesë për trafikun. Intensiteti i trafikut në rrugët jashtë zonave urbane është mesatar. Në vendkalimet kufitare, në anën maqedonase, nuk ka vonesa më të gjata për hyrje dhe dalje nga vendi.
Drejtoria Hidrometeorologjike thotë se sot në orët e mëngjesit në pjesët verilindore do të ketë reshje të lehta lokale bore. Gjatë ditës moti do të jetë me diell me vranësira të lehta deri në mesatare. Në mëngjes do të fryjë erëra mesatare deri të forta nga veriu, lokalisht dhe me forcë mbi 60 kilometra në orë, veçanërisht përgjatë Vardarit dhe në pjesët lindore. Në Shkup, me diell me vranësira të lehta deri në mesatare. Në mëngjes do të fryjë erëra mesatare deri të forta nga veriu, veçanërisht në mëngjes. Temperaturat do të ulen, veçanërisht në mëngjes të cilat do të variojnë nga minus 4 deri në zero, dhe gjatë ditës nga zero deri në 11 gradë Celsius.
Moti i ftohtë do të vazhdojë edhe në ditët në vijim. Nesër në mëngjes do të jetë i kthjellët dhe i ftohtë, kudo me temperatura minimale negative. Gjatë natës drejt të premtes dhe të premten do të ketë reshje të reja, në vendet më të ulëta nga shiu, në vendet më të larta nga shiu dhe bora, dhe në male nga bora. Gjatë fundjavës, moti do të jetë i ndryshueshëm me vranësira dhe më i ftohtë me erëra mesatare deri të forta veriore. Nga e hëna, temperatura ditore do të rritet.
LAMM rekomandon që shoferët të përshtatin shpejtësinë, të respektojnë sinjalet e vendosura të trafikut dhe të ngasin me kujdes, veçanërisht në rrugët nëpër lugina dhe gryka, ku ekziston mundësia e rrëshqitjeve të dheut. Kjo vlen veçanërisht për seksionet Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë dhe përkujton se deri më 15 mars, detyrimi ligjor për posedim të detyrueshëm të pajisjeve dimërore në automjete është i vlefshëm, pavarësisht nga kushtet aktuale të motit.
