Baza strategjike bërthamore e Francës në Île Longue u vu në alarm mbrëmjen e së enjtes, pasi disa dronë fluturuan mbi zonën e mbrojtur, duke detyruar forcat detare të hapin zjarr për t’i neutralizuar.
Sipas xhandarmërisë, pesë dronë u detektuan teknikisht rreth orës 19:30 të datës 4 dhjetor, duke fluturuar mbi ose pranë objektit ultra-të mbrojtur, i cili strehon nëndetëset franceze me raketa balistike me energji bërthamore (SSBN).
Menjëherë pas sinjalizimit, u aktivizua një operacion i posaçëm kërkimi dhe neutralizimi.
Batalioni i pushkatarëve detarë, përgjegjës për sigurinë e perimetrit, hapi zjarr në drejtim të dronëve në përpjekje për t’i ndalur.
Prefektura Detare e Atlantikut dhe prokuroria nuk komentuan menjëherë incidentin, ndërsa hetimet vazhdojnë për të përcaktuar origjinën dhe synimin e fluturimeve.
Baza e Île Longue konsiderohet një nga objektet më të ndjeshme në territorin francez.
Ajo është “shpirti i parandalimit bërthamor të Francës”, duke mirëmbajtur katër nëndetëset strategjike të vendit, nga të cilat të paktën një ndodhet gjithmonë në det për të garantuar gatishmërinë e doktrinës së parandalimit.
Siguria e bazës sigurohet nga 120 xhandarë detarë, të koordinuar me trupat e këmbësorisë detare.
Sipas autoriteteve, dronët në zonën e Crozon-it nuk janë të rrallë, por mbi bazën bërthamore rastet janë shumë më të ndjeshme.
Vetëm pak javë më parë, mbrëmjen e 18 nëntorit, është raportuar një tjetër fluturim droni mbi gadishullin Crozon – por pa hyrë mbi instalimet ushtarake.
