Instituti i Shëndetit Publik njoftoi se analizat e ujit të marra nga SHF “Dimo Haxhi Dimov” janë përfunduar plotësisht dhe se analizat fiziko-kimike dhe mikrobiologjike janë brenda vlerave referuese. Sipas ISHP-së, në mostrat e ujit nuk janë gjetur metale të rënda, transmeton Portalb.mk.
Analizat kanë treguar praninë e norovirusit te gjashtë fëmijë.
“Siç raportuam më herët për mostrat e ushqimit dhe sipërfaqeve të punës nga shkolla e njëjtë, në musaka dhe në disa sipërfaqe të kuzhinës dhe të shkollës janë gjetur baktere fekale Enterobacteriaceae, të cilat tregojnë mungesë higjiene në shkollë dhe në kuzhinë. Nga shtatë mostrat e materialit biologjik të pranuara në Institutin e Shëndetit Publik nga fëmijët që paraqitën simptoma, gjashtë kanë rezultuar pozitivë për Norovirus”, njofton ISHP.
Për mostrat shtesë të ardhura nga nëntë shkolla të tjera, ISHP do të informojë të hënën.
“ISHP është në komunikim të vazhdueshëm me institucionet e tjera kompetente dhe për çdo informacion shtesë do ta informojë opinionin”, thuhet në deklaratën e Institutit.
“Deri tani, në Klinikën e Sëmundjeve të Fëmijëve, trembëdhjetë fëmijë nga e njëjta shkollë kanë kërkuar ndihmë mjekësore, ndërsa katër ende janë të shtrirë në spital, por në gjendje të mirë shëndetësore, deklaroi për Kanal 5 drejtori i Klinikës, Rexhep Memedi.
“Me të njëjtën pamje klinike dhe simptomatologji të ngjashme, dhimbje barku, të vjella, diarre dhe temperaturë te disa prej tyre. Shtatë prej tyre u mbajtën për trajtim spitalor dhe pas trajtimit mjekësor ishin në gjendje të mirë e stabile; tre prej tyre u lanë dje në shtëpi në gjendje të mirë të përgjithshme, ndërsa katër fëmijë të tjerë vazhdojnë trajtimin spitalor. Deri të hënën, kur të jenë plotësisht në gjendje të mirë, do të lirohen”, tha Memedi.
Kujtojmë se, të paktën 40 fëmijë nga klasa të ndryshme në shkollën fillore “Dimo Haxhi Dimov” në komunën e Karposhit janë helmuar.
Dje, drejtoresha e ISHP-së, Marija Andonovska, deklaroi se baktere nga grupi Enterobacteriaceae janë gjetur në çezmat dhe në ushqimin që kanë konsumuar fëmijët në kuzhinën e shkollës “Dimo Haxhi Dimov”.
“Nga tamponët e marrë në sipërfaqet e punës, nga dorezat e dyerve, çezmat, enët nga të cilat kanë ngrënë dhe nga pulti, nga nëntë sipërfaqe të analizuara, tre tashmë janë pozitive. Pozitive kanë rezultuar çezmat manuale të dy paraleleve dhe një çezmë në kuzhinë. Në këto sipërfaqe janë gjetur baktere nga grupi Enterobacteriaceae – baktere gram-negative që mund të shkaktojnë simptomatologjinë që e shohim te fëmijët e sëmurë. Kjo tregon qartë mungesë higjiene”, tha Andonovska.
