Një histori e re mashtrimi po vjen nga Britania e Madhe, ku një grua e ve ka humbur të gjitha kursimet e jetës dhe shtëpinë, pasi u bind se kishte hyrë në një lidhje romantike me aktorin e njohur të Hollywood-it, Jason Momoa. Mashtrimi ishte realizuar përmes videove të krijuara me inteligjencë artificiale dhe në total i kushtoi asaj 570 mijë euro, raporton LADbible.
Gruaja, identiteti i së cilës nuk është bërë publik për arsye privatësie, nisi të ndiqte një faqe fansash të Jason Momoas pas vdekjes së bashkëshortit të saj me të cilin kishte kaluar 50 vite. Pak kohë më vonë, në mënyrë të papritur, ajo mori një mesazh që mendoi se vinte nga vetë aktori.
Mashtruesit përdorën video të krijuara me AI për ta bindur se ajo dhe aktori 46-vjeçar – i cili u divorcua nga Lisa Bonet në vitin 2024 – ishin të destinuar të ishin bashkë. Pasi fituan besimin e saj, nisën kërkesat për para.
“Jason Momoa” i rremë i pretendoi se kishte nevojë urgjente për para për disa projekte filmike dhe i kërkoi asaj 570 mijë euro, duke e bindur se po ndërtonte shtëpinë e tyre të ëndrrave në Havai. E besuar në historinë e “dashurisë”, e veja shiti shtëpinë e saj në Cambridgeshire për të mbledhur shumën e kërkuar.
Por sapo dërgoi paratë, i ashtuquajturi adhurues misterioz u zhduk pa lënë gjurmë. Policia në Cambridgeshire e ka konfirmuar rastin: “Ky rast mund të tingëllojë i pabesueshëm, por është tërësisht i vërtetë dhe ka lënë një grua të pambrojtur pa shtëpi”.
Nuk është hera e parë që imazhi i aktorit përdoret për mashtrime të tilla. Edhe një gjyshe nga Newcastle kishte rënë pre e një skeme të ngjashme, duke humbur 92.800 euro. Fillimisht ajo dërgoi para për bileta avioni që “aktori” të vinte ta vizitonte, por kërkesat vazhduan.
“Më pas ishin dhuratat për vajzën e tij”, rrëfeu gruaja e mashtruar.
“Fola me dikë që besoja se ishte vajza e tij, që po mbushte 15 vjeç. Më thanë se ai po luftonte me ish-bashkëshorten për të mbajtur shtëpinë dhe se duhej një certifikatë martese për ta ruajtur atë. Kam qenë shumë naive dhe pagova”, shtoi ajo.
