Ministri i Jashtëm i Lituanisë, Kestutis Budrys, ka thënë se do të refuzojë bisedimet me Bjellorusinë për rihapjen e kufirit të tyre, pasi presidenti i saj, Alexander Lukashenko urdhëroi të martën ministrin e tij të Jashtëm të niste negociatat.
Lituania muajin e kaluar ka mbyllur dy pikat kufitare me fqinjin e saj deri në fund të nëntorit, në përgjigje të ndërhyrjeve të përsëritura nga balonat që fluturonin nga Bjellorusia, të cilat kanë ndërprerë trafikun ajror dhe kanë shkaktuar mbyllje në aeroportin e Vilniusit.
Lituania thotë se balonat fluturohen nga kontrabandistë që transportojnë cigare të kontrabanduara dhe fajëson Bjellorusinë për mosndalimin e kësaj praktike, duke e quajtur atë një formë “sulmi hibrid”, raporton Reuters.
“Lukashenko nuk i vendos rregullat… Rekomandimi im këmbëngulës për qeverinë time do të jetë që të mos ndjekë rrugën që po përpiqen të na imponojnë”, ka thënë Budrys.
“Nuk jemi lënë vetëm, kemi përfshirje të plotë të SHBA-së”, ka thënë Budrys, duke folur nga Uashingtoni dhe duke iu referuar takimit të tij me sekretarin e Shtetit, Marco Rubio dhe të dërguarin special të presidentit Donald Trump në Bjellorusi, John Coale, të hënën.
Trumpi ka rritur angazhimin e SHBA-së me shtetin autoritar, duke dërguar delegacione të shumta në Minsk këtë vit, ndërsa Lukashenko po kërkon të riparojë marrëdhëniet me Uashingtonin pas viteve të izolimit dhe sanksioneve.
Në shtator, Bjellorusia ka liruar 52 të burgosur pas një apeli nga Trumpi. Ai më parë i kishte kërkuar Lukashenkos, i cili ka qenë në pushtet për më shumë se 30 vjet, të lironte 1,400 të burgosur të cilët udhëheqësi i SHBA-së i ka përshkruar si pengje.
