Taylor Swift ka bërë një gjest prekës duke dhuruar 100 mijë dollarë (rreth 86 mijë euro) për trajtimin e një vajze dyvjeçare të quajtur Lilah, e cila po lufton me kancer në fazën e katërt. Dhurata e saj bujare erdhi vetëm dhjetë ditë pasi një video e vajzës u bë virale në rrjetet sociale, ku ajo e quante Taylor-in “miken e saj”.
Fushata për mbledhje fondesh ishte hapur në platformën GoFundMe, pasi Lilah ishte diagnostikuar me sëmundjen e rëndë në moshën vetëm 18-muajshe. Historia e saj preku zemrën e Taylor-it pasi në internet qarkulloi një video ku vogëlushja shihte klipin e këngës “Fate of Ophelia” dhe, duke treguar me gisht ekranin, thoshte plot gëzim: “Ajo është mikja ime!”
Në datën 17 tetor, këngëtarja vendosi të ndihmonte duke bërë një donacion prej 100 mijë dollarësh në faqen e GoFundMe të familjes, duke lënë edhe një mesazh të ndjerë: “Po i dërgoj një përqafim të madh mikes sime, Lilah!”.
Gjestin e saj e ndoqën edhe mijëra fansa të njohur si Swifties, të cilët filluan të dhurojnë shuma simbolike prej 13 dollarësh – një numër që ka domethënie të veçantë për këngëtaren.
Ndërkohë, suksesi i Taylor Swift nuk ndalet. Albumi i saj i 12-të në studio, “The Life of a Showgirl”, është shitur në më shumë se katër milionë kopje brenda vetëm një jave në SHBA, duke thyer rekordin që për gati një dekadë mbahej nga Adele.
Me këtë arritje, Swift është bërë artisja solo me më shumë albume që kanë arritur numrin 1 në Billboard 200 – plot 15 albume – duke kaluar emra të mëdhenj si Drake dhe Jay-Z që kanë nga 14.
E vetmja qëndron përpara saj vetëm grupi legjendar The Beatles, me 19 albume që kanë kryesuar listën.
