OKB-ja ka rikthyer sanksionet gjithëpërfshirëse ekonomike dhe ushtarake ndaj Iranit, 10 vjet pasi ato u hoqën përmes një marrëveshjeje të rëndësishme ndërkombëtare mbi programin e tij bërthamor.
Masat e reja kanë hyrë në fuqi pasi tre partnerët evropianë të marrëveshjes – Mbretëria e Bashkuar, Franca dhe Gjermania – aktivizuan të ashtuquajturin mekanizëm “snapback”, duke akuzuar Iranin për “përshkallëzim të vazhdueshëm bërthamor” dhe mungesë bashkëpunimi, raporton BBC.
Irani pezulloi inspektimet e objekteve të tij bërthamore – një detyrim ligjor sipas kushteve të marrëveshjes së vitit 2015, pasi Izraeli dhe SHBA-ja bombarduan disa nga vendet e tij bërthamore dhe bazat ushtarake në qershor.
Presidenti i Iranit, Masoud Pezeshkian, ka këmbëngulur javën e kaluar se vendi nuk ka ndërmend të zhvillonte armë bërthamore.
Rikthimi i sanksioneve, të cilat Pezeshkian i ka përshkruar si “të padrejta dhe të paligjshme” është goditja e fundit ndaj një marrëveshjeje që u shpall si një pikë kthese në marrëdhëniet perëndimore me kombin islamist të izoluar prej kohësh kur u arrit për herë të parë.
Plani i Përbashkët Gjithëpërfshirës i Veprimit (JCPOA) vendos kufizime mbi instalimet bërthamore të Iranit, rezervat e tij të uraniumit të pasuruar dhe sasinë e kërkimit dhe zhvillimit që mund të ndërmarrë.
Irani e ka rritur aktivitetin e tij të ndaluar bërthamor pasi presidenti amerikan, Donald Trump tërhoqi SHBA-në nga marrëveshja gjatë mandatit të tij të parë si president në vitin 2016.
Ai e ka kritikuar vazhdimisht marrëveshjen, të negociuar nën paraardhësin e tij Barack Obama, si të gabuar, duke u zotuar të negociojë kushte më të mira.
Bombardimi i objekteve bërthamore nga SHBA-ja dhe Izraeli në qershor kishte për qëllim të përmbyste një pjesë të progresit bërthamor të Iranit, si dhe ta ndëshkonte atë për armatosjen e përfaqësuesve rajonalë që kanë sulmuar vazhdimisht Izraelin.
Ndërsa Trumpi ka deklaruar vazhdimisht se sulmet kanë shkaktuar “dëme monumentale”, të tjerë hedhin dyshime mbi masën në të cilën ato kanë dëmtuar programin bërthamor të Iranit.
