Trajneri i Bayern, Thomas Tuchel i mbijetoi ndeshjes së dytë të 1/8-të së Ligës së Kampionëve, pasi skuadra e tij kapërceu një deficit prej 1-0 nga ndeshja e parë me fitoren 3-0 në shtëpi ndaj Lazios, por nuk mund të thuhet e njëjta gjë për gishtin e madh në këmbën e tij të djathtë të trajnerit gjerman.
Pas ndeshjes, Tuchel kaloi duke çaluar para gazetarëve dhe zbuloi se para ndeshjes në dhomën e zhveshjes i kishte mbajtur skuadrës një fjalim motivues dhe e kishte goditur një kuti.
“Kisha dhimbje të tmerrshme dhe shpejt e kuptova pse. Theva gishtin e këmbës. Nuk gjeta guximin të hiqja këpucët. Ekipi pyeste veten pse praktikisht ndenja në bankinë gjatë gjithë lojës”, ka thënë Tuchel.
Është vënë re nga të gjithë ata që e ndoqën ndeshjen në stadium, por edhe përmes transmetimit televiziv, sepse Tuchel njihet si një trajner me temperament që i përjeton me dhunë ngjarjet në fushë.
Gjatë ndeshjes ai është vazhdimisht në këmbë, duke ecur apo vrapuar dhe këtë herë ka munguar sjellja e tij e zakonshme gjatë ndeshjes dhe ka qenë menjëherë e dyshimtë.
Meqë ra fjala, lëndimi i çuditshëm i Tuchel u komentua edhe nga presidenti i bordit mbikëqyrës të Bayernit, Herbert Heiner.
“Unë jam gjithmonë në favor që një trajner të thyejë gishtin e madh të këmbës dhe jo një lojtari i yni”, ka thënë presidenti i Bavarezëve.
