Ministri i Mbrojtjes i Ukrainës urdhëroi të shtunën një hetim mbi një sulm të supozuar me raketa balistike ruse ndaj brigadës sulmuese ukrainase, pas raportimeve se më shumë se 20 ushtarë u vranë gjatë një ceremonie çmimesh.
“Ngushëllimet e mia për familjet e ushtarëve të rënë nga Brigada 128”, tha ministri ukrainas i Mbrojtjes, Rustem Umerov, në një deklaratë në rrjetet sociale, duke shtuar se ai kishte urdhëruar një “hetim të plotë”.
Në një deklaratë të veçantë në aplikacionin e mesazheve Telegram, Forcat e Armatosura të Ukrainës thanë se Rusia sulmoi rajonin e Zaporizhzhia me raketën balistike Iskander.
“Ushtarët u vranë dhe banorët vendas u plagosën gjithashtu,” tha ushtria.
Nuk ishte e qartë se sa ushtarë vdiqën. Deklaratat erdhën pas një morie raportimesh të mëparshme në mediat sociale ukrainase dhe nga blogerët ushtarakë se më shumë se 20 ushtarë u vranë në një fshat afër vijës së frontit në Zaporizhzhia gjatë një ceremonie çmimesh për të përkujtuar Ditën e Artilerisë të premten, shkruan Reuters, transmeton Klankosova.tv.
