Presidenti i Serbisë, Aleksandar Vuçiq, ka thënë se njohja e pavarësisë së Kosovës nga Izraeli e ka lënduar atë shumë.
Vuçiq në një intervistë për “Jerusalem Post” ka treguar se si gjyshi i tij është vrarë gjatë Holokaustit.
“Gjithmonë do t’i konsiderojë hebrenjtë si miq të serbëve, që gjithmonë do të jenë në anën e njëjtë të historisë. Dhe po, njohja e pavarësisë së Kosovës nga Izraeli, na ka lënduar shumë. Por, e bëmë më të mirën për ta tejkaluar këtë situatë. Shpresoj të nisim të rindërtojmë marrëdhënien tonë në mirëbesim dhe të jemi në gjendje të krijojmë besim të vërtetë mes dy shteteve tona”, ka thënë Vuçiq.
Izraeli e ka njohur zyrtarisht pavarësinë e Kosovës në shkurt të vitit 2021. Njohja erdhi si pjesë e Marrëveshjes së Washingtonit të 4 shtatorit të vitit 2020.
