​Thaçi fton think-tanket të bëhen pjesë e momentumit për Kosovën dhe Ballkanin Perëndimor

Në takimin e parë me James Carafano, nënkryetar i “The Heritage Foundation”, Presidenti Thaçi u shpreh se Kosova aspiron anëtarësimin në NATO dhe në BE.

“Anëtarësimi i Kosovës në NATO dhe në BE do të thotë më pak ideologji anti-perëndimore në tërë Ballkanin Perëndimor”, u shpreh Presidenti Thaçi dhe shtoi se për të ecur përpara Kosova po punon në arritjen e një marrëveshjeje të paqes me Serbinë për t’u liruar nga e kaluara dhe për të ecur përpara.

Ndërsa, në takimin me Jane Harman në “The Wilson Center”, Presidenti Thaçi u shpreh se Kosova është shumë me fat që në Uashington gëzon mbështetje bi-partizane.

“Në përkrahjen për Kosovën, në Uashington, nuk ka dallime në mes partive”, u shpreh Presidenti Thaçi dhe shtoi se është me rëndësi që Shtetet e Bashkuara të Amerikës të shtyjnë përpara proceset e konsolidimit të Ballkanit Perëndimor.

Në të dy takimet, Presidenti Thaçi u shpreh se storia e Kosovës është storie e përbashkët e Kosovës dhe e Shteteve të Bashkuara të Amerikës dhe shtoi se kjo storie ka nevojë për kapitullin e fundit që është marrëveshja finale e paqes me Serbinë dhe integrimi në NATO dhe në BE.

Presidenti Thaçi u shpreh se është krijuar një momentum i ri me angazhimin e drejtpërdrejtë të presidentit amerikan Donald Trump dhe nëpërmjet të dërguarit special, ambasadorit Grenell, dhe ftoi që të përkrahet dhe të shfrytëzohet ky momentum i krijuar për të sjellë paqe, stabilitet dhe zhvillim ekonomik në Kosovë dhe në tërë Ballkanin.