Në një intervistë për emisionin ZOOM, zv/kryeministri Bekim Sali, i oyetur rreth asaj se a duhet të ketë zgjedhje të parakohshme parlamentare tha se qytetarëve u nevojiten zgjidhje e jo zgjedhje.
Ai tha se edhe pse VLEN ka treguar performancë të qëndrueshme në dy cikle zgjedhore, duke fituar zgjedhjet parlamentare dhe komunale, dhe zgjedhjet e parakohshme vetëm do ta rrisnin numrin e mandateve të koalicionit shqiptar në qeveri, situata politike aktuale nuk e bën të domosdoshme mbajtjen e zgjedhjeve të reja.
“Qytetarëve u duhen zgjidhje për një jetë më të mirë, jo domosdoshmërisht zgjedhje të menjëhershme. Analiza e situatës politike tregon se mund të jetë më e dobishme të vazhdojmë me organizime të tjera paraqitëse, duke shfrytëzuar momentumet pozitive që kemi nga fitoret e kaluara,” tha Sali.
Ai theksoi se në zgjedhjet e ardhshme parlamentare, VLEN synon vetëm rezultate pozitive dhe rritje të përkrahjes nga qytetarët.
