Procesi i votimit zhvillohet në një atmosferë të qetë. Autoritetet policore thonë se kanë qenë sporadike rastet e tentimeve nga ana e disa qytetarëve për transport të organizuar votuesish, fotografim fletëvotimesh apo grafitë. Nga ana, tjetër, dalja në votime, e cila në orët e para të ditës reflektonte një disbalancë mes njësive zgjedhore, gjatë mesditës përjetoi një ngjitje të menjëhershme. Autoritetet thonë se, gjithsesi, protokollet shëndetësore janë një përgjegjësi shtesë për votuesit. Këto zgjedhje të parakohshme janë të parat zgjedhje që zhvillohet në kushte të jashtëzakonshme për shkak të krizës disa mujore tashmë me koronavirusin. Këtë proces zgjedhor, televizioni Alsat e ndjek hap pas hapi, me edicione të shpeshta lajmesh në çdo dy orë, me lidhje të drejtpërdrejta nga thuajse të gjitha rajonet e Maqedonisë. Duke qenë se ky votim përmbyllet në orën 21:00 të mbrëmjes, pas kësaj kohe Televisioni Alsat do të nisë maratonën e analizës së procesit zgjedhor dhe bashkërisht me të ftuarit tanë do të presim dhe komentojmë rezultatet e kësaj dite.
